Каирдің басты сахнасында Алмасбек Алматов, Батыржан Мықтыбаев, «Салтанат» мемлекеттік би ансамблі, «Астана Опера» солистері, «Алашұлы», «Сұлу» топтары және басқа да отандық әртістер өнер көрсетті. Олар эстрадалық, халық әндері мен классикалық шығармаларды орындады. Өнерпаздарды дирижер Абылай Тілепбергеннің жетекшілігімен Құрманғазы атындағы ұлттық халық аспаптар оркестрі сүйемелдеді.
Залда жергілікті көрермен көп болды. Гала-концерт көрермендері Мысырдың дәстүрлі әуендерінің попурриін ерекше жылы қабылдап, зор қошемет білдірді.
Гала-концертпен қатар Каир опера театрында қазақ қолданбалы өнерінің көрмесі өтті. Ұлттық киімдегі әртістер мен қолөнершілер қонақтардың назарына қолдан жасалған дәстүрлі бұйымдарды ұсынды.
Гала-концерттен кейін Мәдениет және спорт министрі Асхат Оралов Мысырдың мәдениет министрі Невин Әл-Киланимен кездесу өткізді. Асхат Оралов әріптесіне мәдениет күндерін ұйымдастыруға көмектескені үшін алғыс айтып, Әл-Килани мырза мен жергілікті әртістерді Қазақстанға шақырды.
«Мысырда Қазақстанның мәдениет күндеріне арналған іс-шаралар жоғары деңгейде өткенін атап өткім келеді. Каир тұрғындары мен қонақтары біздің әртістеріміздің өнеріне тәнті болғанына сенімдімін. Әлемді қазақ мәдениеті мен өнерімен таныстыратын осындай іс-шаралар басқа елдерде де өтеді. Осылайша, мәдениет саласының қызметкерлері әлемдік сахналарда өз талантын көрсете алады. Министрлік бұл бағытта белсенді жұмыс жүргізіп жатыр», – деді Асхат Оралов.
Б.ИКРАМОВА