Аты аңызға айналған әнші, КСРО және Қазақстанның халық әртісі, Халық Қаһарманы Роза Бағланова атындағы Астана қаласы Білім басқармасына қарасты №2 Балалар музыка мектебінің оқушыларынан құрылған «Балдәурен» оркестрі Өзбекстан Республикасы Ташкент қаласында өткен Tashkent Summer Festival 2023 халықаралық байқау-фестиваліне қатысып, «Халық аспаптары» номинациясында бас жүлдені жеңіп алды.
– Ташкент қаласында өткен Халықаралық мәдени байланыстарды нығайту және шығармашылық ынтымақтастықты дамыту мақсатында өткен Tashkent Summer Festival халықаралық байқау-фестивалінде оркестріміздің өнер көрсеткені үлкен абырой, – дейді «Балдәурен» оркестрінің жетекшісі Стамғазы Архат.
Оркестр Астана қаласындағы көпшілік шараларға қатысып, республикалық, қалалық, облыстық байқауларда жүлделі орындарды алып жүр.
– Талантты жастардың басын қосып, ұлттық өнеріміздің дамуына қолдау көрсеткен №2 Балалар музыка мектебінің директоры Ли Владислав Владимировичқа рақмет айтамыз, – дейді талантты өрендер.