Депутаттар іссапар барысында Ақсу қаласына қарасты Черемушки кентінде инженерлік желілер (сумен жабдықтау) салу, Ақсу қаласының магистралдық және тарату жылу желілерін реконструкциялау және қалалық №7 орта мектебінің күрделі жөндеу жұмыстарымен танысты. Черемушки кентінде сумен жабдықтау желілерін салу жұмыстары 2023 жылдың сәуір айында басталған. Аяқталу мерзімі – алдағы қыркүйек айы. Орталықтандырған су жүйесінің жалпы желісі 7,7 шақырымды құрайды. Қалалық құрылыс бөлімінің айтуынша, мердігер компания жұмыстың негізгі бөлігін аяқтаған, қазір су құбыры құдықтарын монтаждау жұмыстары жүргізілуде.
Ал 1971 жылы салынған қалалық №7 орта мектеп сол уақыттан бері күрделі жөндеу көрмеген екен. Күрделі жөндеу жұмыстарына: жылу мен электр жабдықтау жүйелері, кәріз, қабырғалар, едендер, төбелер мен есіктер енді. Үш айға созылатын құрылыс жұмыстарының жалпы құны – 230 миллион теңге. Мердігер ұйым мектеп оқушылары оқу жылын аталмыш мектепте бастайды деп сендірді.
«Біз бұл жөндеу жұмыстарын бақылауда ұстаймыз. Қалалық және облыстық депутаттар үнемі тексеруге шығып тұрады. Мерзімі бар, уақытылы және сапасыз орындалса, тиісті шаралар қолданатын боламыз. Бұл мектеп 50 жыл жөндеу көрмеген. Былтыр облыс бойынша көптеген мектеп мерзімінде тапсырылмады. Сондықтан үлкен жауапкершілікпен қараңыздар», – деді облыстық мәслихат депутаты Раушан Даумова.
Сондай-ақ депутаттар мен жергілікті партия филиалы Достық және М.Омаров атындағы ауылдық округ әкімдерінің сайлау алдында берген уәделері бойынша есебін тындады. Аталған ауыл әкімдері «AMANAT» партиясының атынан сайлауға қатысқан болатын.