Маусымның 14-і күні Орталық коммуникациялар қызметінде өткен брифингте Алматы облысының әкімі Марат Сұлтанғазиев Қонаевтан ойынханалардың көшірілетін-көшірілмейтіні жөнінде пікір білдірді.
"Бүгінде ойынханалар жұмыс істеп тұр және оларды көшіру жоспарда жоқ. Құмар ойынға әуестік Қазақстанда ғана емес, бүкіл әлемде бар. Кей адамдарға онлайн казино арқылы ойнаған ұнайды. Біз бар ойынханалардың ойын-сауық орталығы ретінде жұмыс істеуі үшін талаптар қоямыз. Бұл халықаралық тәжірибе: ойынхана өздігінен жұмыс істейді", – деді Марат Сұлтанғазиев.
Өңір басшысы Қонаевта кинотеатр, аквапарк, сауда орталығын ұйымдастыруға да болатынын атап өтті. Және ойын-сауық саласында жалпы 3,5 мың адам еңбек ететінін сөз етті.
"Облыста 61 мың тұрғын бар десек, оның оннан бір бөлігі осы салада жұмыспен қамтылған. Ойынханалар жыл сайын жергілікті бюджетке 80-90 миллиард теңге салық төлейді. Бұл қыруар қаржы", – дейді Марат Сұлтанғазиев.
2022 жылғы мамыр айында Мемлекет басшысы Қасым-Жомарт Тоқаев Алматы облысының Қапшағай қаласын Қонаев қаласы деп өзгерту туралы Жарлыққа қол қойды.
фото: zakon.kz