Мемлекет басшысы Қ.Тоқаев форум барысында волонтерлерді бүгінгі адамзаттың элитасына теңеді. Форумның негізгі мақсаты – волонтерлік қозғалысты дамыту мен оны қолдаудағы отандық тәжірибені халықаралық деңгейде көрсету.
Халықаралық волонтерлер форумына 34 елден 140-тан аса шетелдік қатысушы келді. Спикерлер қатарында БҰҰ Еріктілер бағдарламасының атқарушы үйлестірушісі Тойли Құрбанов, Түркі мемлекеттері ұйымының Бас хатшысы Кубанычбек Омуралиев, Халықаралық Түркі мәдениеті ұйымының бас хатшысы Сұлтан Раев, Түркітілдес елдер парламенттік Ассамблеясының бас хатшысы Мехмет Сурейя Эр, Тәуелсіз Мемлекеттер Достастығы Атқарушы хатшысының орынбасары Дәурен Абаев, режиссер, Қазақстандағы БҰҰ-ның тұрақты үйлестірушісі Микаэла Фриберг-Стори және т.б. бар. Халықаралық форумға еріктілерден басқа 50-ден астам шетелдік спикерлер келді. Бұл туралы Ақпарат және қоғамдық даму вице-министрі Данияр Қадыров айтты.
Форум барысында Мемлекет басшысы Қасым-Жомарт Тоқаев волонтерлерді адамзаттың элитасы деп атады.
– Бұл форум бірлескен әрекеттер маңызды рөл ойнайтынын көрсетеді. Біз әлемде бұрын-соңды болмаған түрлі проблемаларға кездесіп отырмыз. Сондықтан қазір жарқын болашаққа деген үмітті өшіріп алмау үшін ымырашылдық өте қажет. Мен халықаралық волонтерлік бағдарламалар тиімді екеніне және жеке тұлғалар арасындағы дипломатияны ілгерілетуге мүмкіндік беретініне сенімдімін. Өз өмірін өзгелерге арнап жүргендерге, әсіресе мұны халықаралық деңгейде істеп жүргендерге алғыс білдіргім келеді. Өйткені оларды адамзаттың элитасы, бейбітшілік пен мейірімінің нағыз елшілері деп айтуға болады, – деді Президент Қасым-Жомарт Тоқаев.
БҰҰ Бас хатшысы Антониу Гутерриштің арнайы құттықтауын БҰҰ-ның Қазақстандағы Тұрақты үйлестірушісі Микаэла Фриберг-Стори форум қатысушыларына жеткізіп берді.
– Мен Халықаралық волонтерлер форумына өз құттықтауларымды жеткізіп, Қазақстанға волонтерлікті дамытуға, озық тәжірибе алмасуға және халықаралық ынтымақтастықты нығайтуға деген адалдығы үшін алғыс айтамын, – дейді құттықтау хатында.
Халықаралық волонтерлер форумында БҰҰ Еріктілер бағдарламасының атқарушы үйлестірушісі Тойли Курбанов халықтың жаһандық қартаюымен бірге зейнеткерлік жастың ұлғайып, біршама мамандықтарға жол ашылатынын айтты.
– Ұлы ақын айтқандай, «махаббатқа барлық жас бағынады». Бүгінде біз еріктілік махаббат сияқты жас шектеуін мойындамайтынын байқаймыз. БҰҰ-да еріктілердің жасы – 18-ден 82-ге дейінгі аралықта, – деді Тойли Курбанов.
Форумда Ақпарат және қоғамдық даму вице-министрі Данияр Қадыров волонтерлер саны артқанын, еліміздегі волонтерлік қозғалыстың жаңа белеске көтерілгенін жеткізді.
Сонымен қатар форумда Төтенше жағдайлар министрі, генерал-майор Сырым Шәріпханов волонтерлерге Абай облысындағы орман өртін сөндірудегі ерен еңбектері үшін алғыс айтты. Қостанай облысындағы табиғи өртті сөндіру, Екібастұз қаласындағы төтенше жағдайды жою, Түркиядағы жер сілкінісінің салдарын жою кезіндегі волонтерлердің көмегінің қаншалықты маңызды рөлге ие болғанын қоса жеткізді.
Жанел ҚҰТТЫБАЙ