Былтырғы чемпион атағын қорғап жатқан қазақстандық спортшы қарсыласы Ұлыбританияның 1-ракеткасы Кэти Бултерден басым түсті, екі сет бойынша есеп: 6:1, 6:1. Бұл қос спортшының алғашқы кездесуі еді. К.Бултер өз елінде өнер көрсетіп жатқандықтан бұл матчта бар өнерін көрсететіні әрі жергілікті жанкүйерлердің оны жақтайтыны түсінікті болатын. Лондонда тағы да жаңбыр жауғандықтан, орталық корттағы матч уақытынан кешігіп басталды. Бірінші партияда брейк жасаған Елена 3:1 есебімен алға шықты. Тағы бір брейк – 5:1. Сосын өз геймін қиналмай алды – 6:1. Қазақстандық теннисші екінші сетті де брейкпен бастады – 2:0. Ақыры, матчты кезекті брейкпен тәмамдады – 6:1. 56 минутқа созылған бәсекеде Рыбакина 7 эйспен бірге 7 брейк-пойнттың бесеуін өз есебіне жазды. Ал оның британдық қарсыласы ойын барысында брейк-поинтқа бірде-бір рет жете алмады.
Әлемнің 3-ракеткасы спорт басылымдарына Уимблдонның 1/16 финалындағы жеңісі туралы пікір білдіріп, бұл ойынға көңілі толғанын айтты.
«Бұл айналымда басынан аяғына дейін белсенді әрі сенімді ойнадым. Қарқынды матч болды. Сондықтан ойын көңілімнен шықты. Келесі қарсыласым өте мықты ойыншы. Бірнеше рет кортта кездескенбіз. Беатрис Хаддад-Майяның әртүрлі ойын айласы бар, сақ ойнайды. Ол да солақай болғандықтан, жеңіс оңайға түспейін деп тұр. Тартысты бәсеке болатыны анық. Қолымнан келгеннің бәрін жасап, ойынға жақсы дайындықпен шығуға тырысамын. Биылғы нәтижелерім өте жақсы, Аустралияда «Үлкен дулыға» турнирінің финалына дейін жеттім. Әрине, мұнда да жеңіске жеткім келеді. Басты мақсатым – осы, оның қалай жүзеге асатынын көреміз», – деді теннисші.
Айта кетейік, Елена Рыбакина жекелей сында америкалық Шелби Роджерсті (49-орын) 4:6, 6:1, 6:2, француздық Ализе Корнені (74-орын) 6:2, 7:6 және британдық Кэти Бултерді (89-орын) 6:1, 6:1 есебімен жеңіп, 240 мың еуро көлемінде жүлде алды.
Елена Уимблдон алаңында осымен оныншы рет жеңіске жетіп отыр. Былтыр аталмыш турнирдің чемпионы атанған теннисші жеті рет өзгеден оза шауып, жеңісті ойын көрсеткен еді. Ал биыл үш кездесуін өз пайдасына аяқтады. Рыбакинаның былтырғы Уимблдонның финалында тунистік Онс Жаберді ұтып, чемпион атанғаны белгілі. Биылғы жеңісінен де үміт зор.
Бет қатталып жатқанда: Елена Рыбакина 1/8 финалдағы бәсекесін өткізіп, ширек финалға өтті. Оның қарсыласы – WTA әлемдік рейтингінде 13-орында тұрған бразилиялық Беатрис Хаддад-Майя ойынды соңына дейін жеткізе алмады. Матчтың төртінші ойынынан кейін Беатрис денсаулығы сыр бергенін айтып, медициналық үзіліс алды. Физиотерапевтің тексерісінен кейін ойынды жалғастыруға тырысып бақты. «Беатрис көзіне жас алды, ойынды жалғастырып жатыр. Жеңіс үшін соңына дейін күресуде», – деді тікелей эфирде матч комментаторы. Алайда бұл соңғы гейм болды, 4:1 есебімен жеңіс қазақстандық спортшының пайдасына тиді. Е.Рыбакина үшін бразилиялық теннисші өте қолайсыз қарсылас еді. Бұл екі теннисші биыл қос кездесу өткізген еді. Абу-Дабидегі (БАӘ) жарыста Беатрис үш партияда басым түсті: 3:6, 6:3, 6:2, ал Штутгарттағы (Германия) додада қазақстандық спортшы 6:1, 3:1 есебімен басым тұрғанда, бәсекені жалғастырудан бас тартты. Әлемдік БАҚ өкілдері осы көрсеткіштерді алға тартып, Хаддад-Майяға жеңіс тілеген еді. Десе де, қазақстандық спортшының жолы болды.
Асыл ТҰМАР