«Жобаның мәні мен маңызы екінші дүниежүзілік соғыс ардагерлерінің, тыл ардагерлерінің және соларға теңестірілген тұлғалардың қазіргі таңдағы тыныс-тіршілігімен, хал-жағдайымен танысып, оларға қамқорлық таныту, іс-шаралар ұйымдастыруда ақылдасып-кеңесуде жатыр. Ардагерлермен өткізілген әрбір іс-шараның артында үлкен тағылым, тәрбие бар. Олардың ерліктерін естіген жастардың қызығушылығы, елге деген, туған топыраққа деген сүйіспеншілігі арта түсетінін байқап жүрміз», – дейді «АМАNАТ» партиясы Түркістан облыстық филиалы Атқарушы хатшысының орынбасары, облыстық мәслихат депутаты Қалыйма Жантөреева.
Жоба аясында Түркістан облысында 26 сәуір мен 6 мамыр аралығында ұйымдастырылған «Қарттарым, аман-сау жүрші!» онкүндік іс-шарасы кезінде жергілікті жерлердегі БПҰ-ның белсенділік танытуымен «Ардагер денсаулығы», «Жақсылық жасап жарысайық!», «Қамқор», «Ерлік ешқашан ұмытылмайды» акциялары, жалпы саны 170 іс-шара өткізілген. Нәтижесінде, 14 екінші дүниежүзілік соғыс ардагеріне, 105 тыл еңбеккеріне, сондай-ақ әртүрлі саладағы 513 ардагерге азық-түлік таратылды. Сонымен қатар қарттарға медициналық көмек көрсетуге арналған «Ашық есік күні» түрлі мекемелерде әртүрлі саладағы ардагерлермен кездесулер ұйымдастырылды.
– Облыста жобаны іске асыру он екі кесте арқылы жүзеге асырылуда. Соның бірі ретінде «Жастар Рухы» жастар қанатының жанынан құрылған еріктілер тобы іске асырып жатқан істерді атап өтуге болады. Аудандарда құрылған еріктілер тобының құрамы 10 партия мүшесінен кем емес. Олар өздерінің жоспарына сәйкес, әрбір ардагерді тұрғылықты мекенжайы бойынша белгілеп, бөліп алып, ұдайы хабар алып тұрады, мерекелік концерттерге, кездесулерге, тіпті, дәрігердің тексеруіне тұрақты түрде алып баруға ықпал етіп отырады. Сондай-ақ ардагерлердің аулаларын тазалау, әктеу, көгалдандыру сияқты жұмыстарға қолғабыс етеді, – дейді Қ.Жантөреева.
Облыстық мәслихат депутаты өз сөзінде партиялық жоба жұмыстары жалғасатынын жеткізді.
«Жуырда ғана Түркістанда өткен Ұлттық Құрылтайда Мемлекет басшысы Қасым-Жомарт Тоқаев «Әділетті Қазақстан» және «Адал азамат» ұғымдары ел тірегі болатын егіз құндылық ретінде әрдайым қатар тұруға тиіс» деген болатын. Осы тұста ардагерлерге құрмет біздің басты ұстанымдарымыздың бірі болуы керектігін әрбір азамат жадында ұстағаны жөн. Біздің партиялық жобамыздың аты да затына сай. Жұмыстар ары қарай жалғаса береді», – деді депутат.
Назгүл НАЗАРБЕК