Төрт түлікті түлетуге де, егін өсіруге де, орман-тоғайдың пайдасын көруге де, балық шаруашылығының бабын келтіруге де болатын аймақта ерекше кәсіппен нәпақа табатын жан көп. Солардың қатарында Арқас Алатауы орналасқан Алакөл ауданының Үйгентас аймағында ара шаруашылығын өрістетіп жүрген азаматтарды атап өткеніміз артық болмас.
Жақында ғана осы салада еңбек етіп жүргендер балдың өзін ғана емес, басқа да ара өнімдерін сатып алуға болатын алғашқы бал шайқау тақырыптық фестивалін ұйымдастырды. Игілікті іс-шара көркіне көз тоймайтын Лепсі ауылында өтті. Тау қойнауындағы елді мекеннің тұрғындары үшін ара шаруашылығы – негізгі кәсіп түрі және осы жерде өндірілген Лепсі балы шетелде бұрыннан танымал отандық брендке айналған. Облыста бірінші рет өткізілген «тәтті» мерекеге 100-ге жуық адам қатысты.
Фестивальды «Лепсинск.PRO» ЖК басшысы, Лепсі ауылындағы туризм амбассадоры Камилла Вишнякова ұйымдастырып, оған Visit Zhetysu туристік ақпараттық орталығы көмек көрсетті.
– Лепсі ежелден өзінің дәмі тіл үйіретін, шипалылығымен ерекшеленетін балымен белгілі екенін ел-жұрттың бәрі біледі. Заманында «патшаның дастарқанына қояр балды осы жақтан апарған» деген әңгімелер әлі күнге айтылады. Ауылдағы әрбір отбасы дерлік ара шаруашылығымен шұғылданады деуге болады. Біздің отбасымыз да осы кәсіпті жолға қойды. Менің әкем Марат Махмұтұлы – тәжірибелі омарташы. Ол осынау іспен 12 жасынан бастап, яғни жарты ғасырға жуық уақыт бойы айналысып келеді. Сондықтан туған өлкемнің туристік мүмкіндіктерін насихаттай отырып, ата-бабасынан бастап 160 жылдан астам уақыт бойы бал өндірумен айналысып келе жатқан жерлестерімнің өмірінің осы бір аса маңызды бөлігін назардан тыс қалдыра алмадым. Бұл фестиваль дәстүрге айналады деп сенемін және маусымдағы алғашқы бал шайқау іс-шарасын біз жыл сайын кеңінен атап өтеміз, – дейді бізбен пікір бөліскен ұйымдастырушы К.Вишнякова.
Шарапатты шара барысында сатылымдағы өнімнің бәрінің алдын ала дәмін татып көру мүмкіндігі жасалды. «Лепсі өнімі» ЖШС өкілдері де белсенді қатысып, бал өнімдерінің кең ассортиментін, сондай-ақ бал қосылған табиғи косметиканы ұсынды. Мереке қонақтары тау шөптерінен жасалған табиғи шаймен шөлін қандырды. Сонымен бірге әртүрлі шеберлік сыныбы өткізілді. Ара балауызынан шырақтар жасалып, фотосессия ұйымдастырылды. Ниет білдірушілер ара ұяларынан бал шайқау барысын өз көзімен тамашалау үшін омартаға экскурсия жасады, енді бірі атқа мініп серуендеді. Фестивальда ойын бағдарламасы және концерттік нөмірлер көрсетілді.
– Бүгін біз жаңа өнімдерімізді жұрт назарына ұсындық. Биыл біздің кәсіпорынның технологтары құрамында тау шөптері, жергілікті жеміс-жидек бар шайдың 4 түрін әзірледі. Денсаулыққа пайдалылығы мен дәмінің үйлесіміне баса назар аударылады. Айтпақшы, фестивальға қатысушылар ішкен шай біздің рецепт бойынша жасалған. Біз әрбір өнімнің құрамын аса мұқият зерттейміз. Табиғи косметика, оның ішінде сабын өндіруді жалғастырып жатырмыз, қаптамасын да өзіміз әзірледік. Мұндай имидждік тақырыптық іс-шаралар жергілікті халыққа қажет, өйткені Лепсіні денсаулыққа аса пайдалы балдың таусылмас қоймасы деп айтуға болады. Жергілікті жастардың өкілдері ұйымдастыруға атсалысып, белсене қатысқаны қуантады. Олардың білім алып, туған өлкеге оралып, жерлестерін қолдауға және өлке экономикасын дамытуға күш салары анық. Жалпы, мұндай іс-шаралар өңірдегі туризмді дамыту, халықты жұмыспен қамтып, еңбек адамын қалыптастыруға оң ықпал етері анық, – деп түйіндеді «Лепсі өнімі» ЖШС директоры Фархат Әбузяров.
Болат АБАҒАН,
Жетісу облысы