Сайыстың мақсаты – жастар арасында шешендік өнерді, азаматтық танымды дамыта отырып, жастардың өз көзқарастары арқылы шешім қабылдап, құқықтық сауаттылықты арттыруды интеллектуалды ойын арқылы толығырақ насихаттау.
Интеллектуалды ойын бұған дейін өңірдің барлық аймағында өткен болатын. Жүзден жүйрік шыққан 17 команда облыс орталығында бас қосты. Жарыс алдында сөз алған «AMANAT» партиясы Түркістан облыстық филиалының төрағасы Алтынсары Үмбеталиев интеллектуалды жарыстың іріктеу кезеңдеріне 900-ден астам үміткер қатысқанын айтып, таңдаулылар жиналған бүгінгі сайысқа қатысушыларға сәттілік тіледі.
– 7 кезеңнен тұратын білім жарысында облысымыздың 17 аудан, қаласынан іріктелген 100 үздік команда іріктеліп, жиналып отырсыздар. Ойын қызықты әрі тартысты өтеді деп ойлаймын. Командалардың жеңіске деген құлшынысы жоғары екені көрініп тұр. Әрине, ойын болғаннан кейін біреу жеңеді, біреу жеңіледі. Оған төрешілер өздерінің әділ бағаларын беретін болады. Ойынды ұйымдастырып, өткізуге атсалысқан демеушілерге және партияластарға үлкен алғысымды білдіремін, – деді А.Үмбеталиев.
Әр команда құрамы 6 белсенді қатысушыдан құралған. Олар талаптарға сай түрлі ойындар бойынша ой жарыстырды. Ойын соңында төрешілердің шешіміне сәйкес жеті кезеңнің жеңімпаз командалары анықталып, оларға сый-сыяпат үлестірілді. Турнир қортындысы бойынша 1- орын Төлеби ауданының «Жалын» командасына бұйырса, 2-орынды Бәйдібек ауданының «ВВС», 3-орынды Түркістан қаласының «Тұран БАҚ» құрамасы еншіледі.
Назгүл НАЗАРБЕК,
Түркістан облысы