Дегенмен балалар мен жасөспірімдердің бос уақытын мәнді өткізуіне жағдай жасауда кемшін тұстар болғаны да рас. Осыған байланысты аудан орталығының тұрғыны Үміт Абайхан «AMANAT» партиясының аудандық партия филиалы төрағасы, аудандық мәслихат депутаты Қайрат Көкебаевқа «Бақытты отбасы» жобасы аясында аталған мәселені шешуге ықпал ету жөнінде өтінішпен шыққан болатын.
Қайрат Төребайұлы аталған өтініштің орындалуын өзінің бақылауына алып, депутаттармен ақылдасып, балалардың бос уақытын дұрыс өткізуді қолға алуға ниет білдірген азаматтарға жеке кәсіпкер, аудандық мәслихат депутаты Н. Ирмекеевтің бос тұрған екі қабатты ғимаратын жалға немесе сатып алуға болатыны туралы айтып, қажет болған жағдайда тиісті қолдаулар көрсетілетінін жеткізеді.
Ақыры аудан орталығының тұрғыны, жас кәсіпкер Арман Асылбеков биылғы 1 маусым – Халықаралық балаларды қорғау күнінде жеткіншектерге лайықты тарту жасады. Жоғарыда айтылған екі қабатты ғимаратта өз қаражатына ARMAN&CENTER балалар ойын-сауық орталығын ашты. Ойын-сауық орталығында бүлдіршіндерден бастап, ересек балаларға дейінгілердің бос уақытын өздеріне де, ата-аналарына да пайдалы етіп өткізуіне қажетті барлық жағдай қарастырылған.
– Мемлекет басшысы Қ.Тоқаев: «Балаларға ерекше назар аударуымыз керек. Себебі олардың амандығы – мемлекетіміздің жарқын болашағының сенімді кепілі» деп атап өткенін өздеріңіз де жақсы білесіздер. Балалар – болашаққа деген үкілі үмітіміздің тірегі. Елімізді келешекте кемелдендіретін тың мақсаттарға жеткізетін де солар. Сондықтан олардың заман талабына сай білім алып, тәрбиеленуін үнемі назарда ұстап отыруға тиіспіз, – деп атап өткен партия төрағасы Қ.Көкебаев аудандық мәслихат депутаттарының «Балаларымыз – аманатымыз!» республикалық қайырымдылық жобасы аясында балаларға әрдайым қамқорлық көрсетіп, игі істерді қолдап отыратынын атап кетті.
Орталық ашылғаннан кейін арнайы қабылдауға келген Үміт Абайхан мен тағы басқа да аудан азаматтары партияға алғысын айтып, ризашылығын білдірді.
Болат АБАҒАН,
Жетісу облысы