Жиын барысында облыс әкімінің орынбасары Руслан Бектемір биылға жоспарланған 84 іс-шара мен жобалардың 40%-ы орындалып, қалғаны жыл соңына дейін жүзеге асатынын жеткізді.
Алайда орындалмау қаупі бар екі жоба белгілі болды. Солардың бірі – өрт қауіпсіздігінің алдын алу мақсатында қолған алынған «Өрт сөндіру депосының» құрылысы. Осыған дейін төтенше жағдайлар департаментінің аталмыш ұсынысы қаралмай, Ақтау қалалық әкімдіктен бөлінген жерлер бірнеше рет қайтарылып алынған болатын.
«AMANAT» партиясы Маңғыстау облыстық фракциясының төрағасы Нұрбек Қарасаев депо құрылысының мәселесін аяқсыз қалдырмау мақсатында Ақтау қаласы әкімдігінің, төтенше жағдайлар департаментінің өкілдерімен, облыстық мәслихат депутаттарымен жиын өткізді. Жиын барысында олар өрт сөндіру депосын салуға жер бөлу мәселесін шешу жолын қарастырды. Талқылау нәтижесі бойынша қалалық әкімдік өрт сөндіру депосын салуға қаулы шығарып, жер бөлді. Осылайша, депо салу жұмысы облыстық құрылыс басқармасына тапсырылды. Өз кезегінде, облыстық құрылыс басқармасы алдағы сессияда қаржы бөлу бойынша жобаны дайындап, ұсынатындарын айтты. Тұрғындарды өрт апатынан қорғау маңызды мәселе екенін алға тартқан партия филиалының төрағасы Нұрбек Қарасаев жоба толық аяқталғанша партия бақылауында болатынын жеткізді.
Н.ОРАЗҒАЛИ