Партия хатшысы Эльдар Жұмағазиевтің төрағалығымен өткен талқылауға бизнес өкілдері, барлық деңгейдегі мәслихат депутаттары, «Атамекен» ҰКП өңірлік кәсіпкерлер кеңесінің өкілдері, облыс әкімдерінің орынбасарлары, Ауыл шаруашылығы, Энергетика, Қаржы, Сауда және интеграция, Индустрия және инфрақұрылымдық даму вице-министрлері қатысты. Өңірлердегі өкілдер онлайн қосылды. Кәсіпкерлер көтерген мәселелердің қатарында ауыл шаруашылығы шикізатының бақылаусыз импорты, бидайдың нарықтық бағасының төмендігі, қоғамдық көлік жүргізушілерінің жетіспеушілігі, битум тапшылығы, салық салу, газдандыру, жүк тасымалдау мәселелері айтылды. Мұндай кездесу бұған дейін батыс өңіріндегі облыстармен де өткен екен. Партия хатшысы сөз басында сол кезде көтерілген мәселелерге тоқталып өтті.
«Батыс өңіріндегі кәсіпкерлерді бірінші кезекте киіктер санының көбейіп кетіп, егістіктерді таптап жатқаны жөніндегі проблема алаңдатып отыр. Одан кейінгі кезекте «Жер Аманаты» жобасының жүзеге асу жайы тұр. Ал Ресейден келетін импорт нөпірі артып, оның ішкі нарықтағы тауарлардың өзіндік құны мен бағаға теріс әсер етіп отырғаны тек батыс өңіріне ғана емес, күллі Қазақстанға тән. Одан бөлек дизель отынының бағасы да алдағы егін ору науқанында шаруаларға қиындық тудырар түрі бар. Мәселен, Энергетика министрлігі 1 маусымда дизельді отынды жеткізу кестесін бекітті. Олар ұсынып отырған баға – зауыттан тоннасына 284 мың теңге немесе ҚҚС қоса алғанда литріне 239 тенге. Өңірлерге бөлгенде фермерлерге арналған орташа баға 201 теңгені құрайды, яки 38 теңгеге кем. Бірақ шаруалар бұл цифрды 75 теңгеге дейін көбейтуді сұрауда. Десе де, Энергетика министрлігі баға одан төмен болар болса «сұр импорт» белең алып кетуі мүмкін деп келіспей отыр. Біздің міндетіміз – екі тарапты бір алаңда тоқайластырып, екі жақтың да уәжін тыңдау, ортақ бір келісімге әкелу. Сондықтан да бүгінгі жиында да осы дәстүр жалғасын табатын болады», – деді «AMANAT» партиясының хатшысы Эльдар Жұмағазиев.
Жиын кәсіпкерлерді, отандық тауар өндірушілерді, фермерлерді толғандыратын өзекті мәселелер бойынша ашық диалог форматында өтті. Кәсіпкерлер тиісті министрліктерге тікелей сұрақтар қойып, жауап алуға мүмкіндік алды. Вице-министрлер осы мақсатта шақыртылған болатын. Сұрақтардың көпшілігі Ауыл шаруашылығы министрлігіне қойылды. Одан кейінгі кезекте Қаржы және Энергетика министрлігі жауап берді. Мәселен, Қостанай облысы бидай импорты, СҚО сүт өндірісі, Ақмола автобус парктеріне көлік жүргізуші жетіспейтіні туралы мәселелерді көтерсе, барлық облыстарға ортақ проблемалар – субсидия алудағы қиындықтар, жер телімдерінің тағайындалған мақсатын өзгерту, салық салуда жеңілдіктер беру, битум тапшылығы, сұйытылған газдың аздығы туралы болды. Сұрақ қоюшылар арасында партияның «Ауыл аманаты», «Жер аманаты» жобаларына да үлкен қызығушылық барын байқадық. Өңірлерде «AMANAT» партиясы мен Үкіметтің бірлескен әріптестігі негізінде жүзеге асып жатқан бұл жобаларға қатысуға тілек білдіріп отырғандар саны артып келеді екен.
«Ауыл аманаты» бағдарламасы біздің облыста алғаш рет жүзеге асып отыр. Осы ретте бізге ауыл тұрғындары көптеп хабарласуда. Бірақ сонымен бірге Краснояр, Степногор, Қосшы сынды шағын қалалардың да тұрғындары осы бағдарлама бойынша жеңілдетілген несие алғысы келеді. Бірақ ондай мүмкіндіктері жоқ. Кент тұрғындары да солай. Өйткені бұл жоба ауыл тұрғындарына ғана арналған. Осы мәселе бойынша жауап берсеңіздер?», – деді Ақмола облыстық Ауыл шаруашылығы басқармасы бастығының орынбасары Дулат Сердәлі.
Бұл сұраққа АШМ өкілі Қанат Әубәкіров жауап берді. Ол расында да бұл бағдарлама тек ауыл тұрғындарының табысын арттыруға арналғанын айтып, өзгедей елді мекендердің тұрғындарын жастарға арналған немесе «Агронесиекорпорациясының», аймақтық бағдарламалардың көмегіне жүгінуге шақырды. Өз кезегінде Партия хатшысы Эльдар Жұмағазиев, қала маңы мен кенттердегі тұрғын үй алаптары тұрғындарының өмір сипаты мен табыс көлемі ауыл тұрғындарынан көп айырмашылығы жоқ екенін атап өтіп, алдағы уақытта құрылатын «Жобалық кеңселер» аясында бұл мәселені көтеретінін жеткізді. Жалпы бейнеконференция барысында жиын хаттамасына енгізіліп, алдағы уақытта шешімін тапқанша назарда болатын мәселелер аз болған жоқ. Ал дәстүрге айналған мұндай кездесулер «AMANAT» партиясының базасында шағын және орта бизнесті дамытудың ең өзекті мәселелерін талқылау және шешу, салалық бизнес қауымдастықтары мен мемлекеттік органдар арасындағы кері байланысты нығайту және өзекті мәселелерді жедел шешу алаңдарын құруға бағытталып отыр.
Нұрлан ҚОСАЙ