Сайысты «AMANAT» партиясының «Жастар Рухы» жастар қанаты мен Спорттық би федерацияларының қауымдастығы ұйымдастырды. «Есірткіге жол жоқ!» жобасы аясында өтіп жатқан шараның салтанатты бөліміне «AMANAT» партиясының Атқарушы хатшысы Дәулет Кәрібек қатысып, құттықтау сөз сөйледі.
Жастар күніне орай өткен іс-шараның басты мақсаты – жастарды саламатты өмір салтын ұстануға үндеп, бос уақытын пайдалы әрі белсенді өткізуге, нашақорлықтан аулақ болуға шақыру.
«AMANAT»-тың Атқарушы хатшысы Дәулет Кәрібек Bir Tolqynda чемпионаты тек би мерекесі ғана емес, жастарды қоғам денсаулығы мен әл-ауқаты үшін күресуге белсенді қатыстыруға бағытталған сенімді серпін екенін атап өтті.
«Есірткімен күрес жүргізу партия мен жастар қанаты үшін басым бағыт саналады. Саламатты өмір салты – қуатты әрі гүлденген қоғамның кепілі. Біз денсаулық сақтау жүйесін жақсартуды көздеп қана қоймай, жастардың белсенді дамуы үшін барынша қолайлы жағдай жасауға, олардың өз қабілет-қарымын танытуына мүмкіндік беруге ұмтыламыз. Біздің сайлауалды бағдарламамызда «Жастармен бір толқында» атты жеке тарау бар. Бүгінгі чемпионаттың осыған ұқсас атаумен өтіп жатуының да өзіндік мәні бар деуге болады. Жастарға жасампаз болу үшін мүмкіндік беру керек. Осы орайда біз шығармашылық бастамаларды қолдау, мәдениет пен спортты дамытуға жағдай жасау міндетін өз мойнымызға аламыз», – деді ол.
Турнир қарсаңында өткен баспасөз мәслихатында «Жастар Рухының» төрағасы Нұржан Жетпісбаев, Республикалық Спорттық би федерациялары қауымдастығының төрағасы Бауыржан Сейфуллин және әлемдік деңгейдегі бельгиялық биші, OG Legion X және The Cage халықаралық командасының мүшесі Thanh Long (CHARMANT) чемпионатқа дайындық барысы туралы айтты. Нұржан Арғынұлы Bir Tolqynda заманауи би чемпионаты жастар қанаты өткізіп жатқан «Есірткіге жол жоқ!» жобасы аясында ұйымдастырылып жатқанын хабарлады. «Жастар Рухы» жастар қанаты өскелең ұрпақты саламатты өмір салтын ұстануға шақырып, есірткіге қарсы күресуге үндейді. «Жастар Рухы» жастар қанатының төрағасы Нұржан Жетпісбаевтың айтуынша, жастар арасында нашақорлықпен күресті насихаттау – аса маңызды.
«Мемлекет басшысы Қасым-Жомарт Тоқаев Қазақстан халқына Жолдауында және Ұлттық құрылтайда жас ұрпақтың денсаулығына зиян келтіретін есірткі заттарының таралуына тосқауыл қоюды тапсырды. Ресми дерекке сәйкес, Қазақстанда психоактивті заттарды қолданған 108 мың адам есепте тұр. Оның ішінде алкогольге тәуелді – 90 мың, есірткіге тәуелді 18 мың адам бар. Синтетикалық есірткі – ұлт денсаулығына үлкен қауіп. Есірткіні өндіру мен таратуға қарсы күресті күшейту қажет. Жастар қанатының маңызды міндеті – өскелең ұрпаққа саламатты өмір салтын ұстануды, өз денсаулығына жауапкершілікпен қарауды насихаттау, жастардың бос уақытын пайдалы өткізуге ұмтылу және оларды спортқа баулу үшін қолайлы жағдай жасау. Осынау қызықты да серпінді чемпионат «Есірткіге жол жоқ!» жобасының қағидаттары мен құндылықтарын насихаттай отырып, есірткіге қарсы күрес кезіндегі басты оқиғаның біріне айналады. Біз қоғам назарын есірткінің таралуы мәселесіне аударып, отандастарымызды жастарға барынша қолдау көрсетуге шақырамыз. Бидің қуаты мен күш-жігері жастарды жат әдеттен аулақ болуға үндейді. Бұл сайыс – тек бәсеке емес, есірткіге қарсы күрестің қарымды қадамы», – деді «Жастар Рухының» төрағасы Нұржан Жетпісбаев.
Өз кезегінде Спорттық би федерациялары қауымдастығының төрағасы Бауыржан Сейфуллин қатысушылардың жеңіске деген ұмтылысы, шеберлігі мен шығармашылығы аталған чемпионатты айрықша оқиғаға айналдырғанын айтты.
«Біздің фестиваль хип-хоп мәдениетінің туған күнімен сәйкес келді. Аталған би жанрының пайда болғанына биыл – 50 жыл. Бұл – өте маңызды күн. Сондай-ақ осы чемпионат халықаралық Жастар күнімен тұспа-тұс келіп, есірткіге қарсы күресті жандандыру мақсатында өткізіліп отыр. Шығармашылық қоғамдастық бұл бастаманы толық қолдайды. Би өнері мен саламатты өмір салтын үйлестіруді ұтымды шешім деп бағалаймыз. Тиісінше, есірткімен күресетін жастар саны артып келеді», – деді ол.
Үздік бишілерді қазылар алқасының мүшелері анықтады. Олардың арасында брейкингтен түрлі чемпионаттың финалисі B.Boy Yera, Орталық Азия аумағындағы көптеген фестивальдың жеңімпазы Алик, Бельгиядан келген әлемдік деңгейдегі үздік биші Thanh Long (CHARMANT) және «Танцы» телеарна шоуының хорео-графы Anton Pashulia aka Slam бар.
Осылайша, 6 номинация бойынша жеңімпаздар анықталды. Яғни:
1. Hip-Hop 3x3 – Айдос, Хьюго, Саня;
2. Hip-Hop new players 1x1 – Nursaya;
3. Krump 1x1 – Saint Sinner;
4. Breaking 2x2 – Simple System;
5. Breaking & House 2x2 – Маня & Линара;
6. All styles 2b4 – Big Out, Twin Out, Кося, Лука.
Жеңімпаздарға арнайы ақшалай сертификаттар табысталды.
Ал биші Twinn Оut арнайы Red Bull Wild Card номинациясында жеңіске жетті және енді ол Алматы қаласындағы Red Bull dance Your Style ұлттық финалына қатыса алады.
Айта кетейік, жыл басынан бері «Жастар Рухының» белсенділері есірткі граффитін бояп, үнемі рейдтерге шығып келеді. Еліміздің барлық 20 өңірінде осындай 4 мыңнан астам «хабарландыру» жойылды.
Сонымен қатар түрлі оқу орнында есірткі заттарының зияны туралы дәрістер өткізіледі. Сараптамалық алаңдар ұйымдастырылып, онда жастар қауымы танымал тұлғалармен, депутаттармен кездеседі.
Бұған дейін «AMANAT» партиясы жанындағы Республикалық Жастарды қолдау кеңесінің мүшелері жасөспірімдер мен жастардың денсаулығына зиян келтіретін электронды темекінің, алкогольдік ішімдіктердің, есірткінің таралуы мен заңсыз айналымы үшін жауапкершілікті қатаңдату мақсатында заңнамаға түзетулер енгізуді ұсынды.
Нұрлан ҚОСАЙ