Екінші сәби дене жарақатын алды. Атап өтер жайт, оқиғаның екеуі де әншейінде мақтағанда жарнамасы жер жаратын жекеменшік балабақшаларда болған.
Бұған дейін белгілі болғандай, 26 маусым күні Атыраудағы «Нартайлақ» жекеменшік балабақшасында бүлдіршін саусағынан айырылған еді. Оқиға қоғамдық резонанс тудырып, әлеуметтік желілерде ата-аналар құзырлы органдардан жеке балабақшалардың бірін қалдырмай тексеруді талап етті. Біз зардап шеккен баланың әкесіне хабарласып, оқиғаның мән-жайын анықтап сұрадық. Аяқастынан қиын жағдайға тап болған әке оқыс жағдай туралы ата-анаға бала ауруханаға жеткізілгеннен кейін ғана хабарланғанын әлі түсіне алмай жүр.
«Біз барған уақытта дәрігерлер баланың қолын тігіп, медициналық көмек көрсеткен екен. Баламның саусағының тырнаққа жалғанған буыны үзіліп кеткен. Дәрігерлер үзілген буынды қайта жалғап, тігу мүмкін емес дейді. Тәрбиешілердің айтуынша, бала әткеншекте ойнап отырып, оқыс құлаған. Салдарынан осындай жағдай болған. Бірақ балабақшадағы әткеншек қауіпсіз. Тап осы әткеншектен мұндай жағдай болуы мүмкін емес», – дейді баланың әкесі Ержан Елеуұлы.
Айтуынша, баласы 2 жылдан бері осы балабақшаға барып жүрген.
«Бұған дейін де кейде денесінің бір жері көгеріп, жырылып келіп жүрді. Бірақ оған мән бермейтінбіз. Қанша дегенмен, бала ғой, сүрініп, құлауы мүмкін. Бұл жағдай балабақшаның балаларға жауапкершілікпен қарамайтынын көрсетіп отыр», – дейді ол.
Қазір бүлдіршіннің ата-анасы полицияға шағым түсірді. Төрт жасқа енді толған бүлдіршін қазір жарақат алып, үйінде жатыр. Атырау облысының Полиция департаменті аталған дерек бойынша сотқа дейінгі тергеу басталғанын хабарлады.
Өткен аптада Атырауда тағы да жекеменшік балабақшада сәби зардап шекті. Бұл туралы Самал Тұқпатова есімді атыраулық ана әлеуметтік желідегі парақшасына жазып, көптен көмек сұрап дабыл қақты. Дамуында тежелу белгісі бар ерекше баласының балабақшадан арқасының зақымданып келгенін жазған ананың жанайқайы лезде көптің қолдауына ие болды.
Сәбидің анасы Самалдың айтуынша, баласы «Зейнеп – Әмина» балабақша желісі филиалдарының біріне барып жүрген.
«Үйге әкелгеннен кейін киімін шешкенімде балам қатты жылады. Басында түсінбедім. Кейін арқасын қарағанымда зақымданғанын көрдім. Дереу балабақшаға барып, директоры, тәрбиешісімен кездестім. Бірақ маған камерадағы жазбаны көрсетпей отыр. Іс қозғалды. Әділдікке қол жеткіземін», – деді Самал Тұқпатова.
Оқиғаға байланысты Атырау облысы әкімінің орынбасары Жасұлан Бисембиев пікір білдіріп, жағдайдың бақылауда екенін жазды.
«Атырау облыстық Білім беру басқармасы мен Атырау қалалық білім бөліміне оқиғаны зерделеуге байланысты тапсырма бердім. Кез келген баламен жұмыс істейтін орталық ең алдымен жауапкершілікті сезінуі тиіс», – деді Жасұлан Бисембиев.
Әлеуметтік желілерде шу болып жатқан жағдайға байланысты «Зейнеп – Әмина» балалар бақшасы әкімшілігі мәлімдеме жасады.
«Мәселе бойынша міндетті түрде тексеріс жүргізіледі, кінәлі адамдар анықталған жағдайда заң жүзінде жазаланады», – деп жазды балабақша әкімшілігі Instagram желісіндегі ресми парақшасында.
Жалпы, бұл Атыраудағы балалар орталықтарына қатысты бірінші жағдай емес. Осыдан үш жыл бұрын Атырауда «Алтын балық» мамандандырылған балабақшасында балаларды аяусыз ұрып-соққан тәрбиеші төрт жылға бас бостандығынан айырылды. Күні кеше Атыраудағы балаларды оңалту орталығының тәрбиешісіне қатысты қылмыстық іс қаралып, балаларды тәрбиелеумен емес, ұрып-соғумен айналысып келген қызметкер 4 жылға сотталды. Тізе берсек, мұндай жағдай көп.
Көпбалалы ана Мәлике Мәлікқызы баланы балабақшаға беруге мүлде қарсы.
«Қазір желіні ашып қалсақ, үлкенге де, кішіге де көрсетілген қорлыққа толы ақпарат қаптап жүреді. «Шегірткеден қорыққан егін екпейдінің» кебін кигеннің бірі мен. Өзімнің бес балам бар. Ешқайсысын да балабақшаға бермедім. Балаларымды өзім бағамын. Әрі қарай мектеп жасына жеткенше ата-әжесі көмектеседі. Мен баланы ерте жастан дамытуды қолдайтын адаммын. Күніне 2-3 сағатқа балаларымды дамыту орталықтарына тасып жүріп, мектеп жасына жеткізген жайым бар», – дейді ол.
Білім саласының ардагері Қанаш Шыңдыбайқызы балабақшаларда талап күшею керегін айтады.
«Мейлі ол мемлекеттік, мейлі жекеменшік балабақша болсын, ең әуелі сол бақшаның басшысы әр бала үшін жауапкершілік барын сезіне білуі керек. Сондай-ақ мамандарды жұмысқа қабылдағанда оның дипломы, еңбек өтілімен бірге психологиялық жағдайына да мән берген дұрыс. Тобындағы бала көп ауырды ма, топ шараларына белсенді қатыспай ма немесе тобында бір бала оқыс құлады ма – осындай кездерде тәрбиешінің жалақысының белгілі бір бөлігін кесіп отыру керек. Қазір тәрбиешілер баладан бұрын үйге кетіп қалуға асығып тұрады. Темірдей тәртіп пен талап болмаған жерде өсу болмайды», – деді ардагер ұстаз.
Қалай десек те, ата-ана балабақшаға бүлдіршінін аманаттап береді. Сондықтан баланың өмірі мен қауіпсіздігі аяққа тапталмауы тиіс.
Баян ЖАНҰЗАҚОВА,
Атырау облысы