Балалардың бойына ұлттық құндылықтарды сіңіру қашанда маңызды. Осыған орай Qonzhyq мобильді қосымшасы жас ұрпақтың ұлттық музыкаға, әдебиетке, мәдениетке, салт-дәстүрге және ана тілін үйренуге деген қызығушылығын оятуға бағытталған. Қазір қосымшада 150 мыңнан астам тіркелген қолданушы бар. Тіпті, шетелдегі қазақтар арасында да жоғары сұранысқа ие. Qonzhyq App қосымшасында халық фольклорының классикалық және заманауи алтын жинақтамасы енгізілген. Бүгінде қосымшада ертегілер, заманауи және халық әндері, түрлі аспаптағы күйлер, бесік жырлары, классикалық және заманауи ақындардың поэзиясы, сонымен қатар Абайдың қара сөздерінің жеңілдетілген нұсқасы да қоса жүктелген. Мобильді қосымша идеясының авторы – Әйгерім Исатаева.
Авторы бастапқы кезде балаларға арналған «Қонжық Марио» атты ертегілер сериясын шығарған. Бұл ертегілер топтамасы кішкентай оқырмандарға түсінікті тілде, балалар психологімен бірлесе отырып жазылған. Кітапшалар бүкіл ел бойынша жақсы сұраныcға ие болып, сатылды. Уақыт өте келе автор барлық жинақталған ұлттық фольклорды мобильді қосымша ретінде шығаруды ұйғарады. Қосымшада синхрондалған мәтін де қоса қарастырылған. Яғни, синхрондалған мәтін тыңдаумен қатар оқуға мүмкіндік береді. Қосымшадағы бөлімдерге келсек, ертегілер бөлімінде халық және авторлық ертегілер қамтылса, әндер бөлімінде балаларға арналған 1 200-ден астам ән бар.
Бүгінде қосымшаны пайдаланушылар аудиториясы кеңейгендіктен, сұраныс та көбейген. Осыған орай команда қолданушылардың ұсыныс-тілектерін ескере отырып, жаңаша контент жасауда.
– Қосымшамызда көпшіліктің құлағында жатталып қалған ертегілер мен күйлер де, көне, көбі ести бермеген туындылар да бар. Ең жиі тыңдайтындарына келсек, Алдар көсе мен Қожанасыр туралы ертегілер және «Адай», «Ақсақ құлан», «Көңіл толқыны» күйлері. Кейінгі ұрпаққа көп пайда алып келер мұра болуы үшін түрлі ұлттық контентпен толықтыру ойда бар. Мысалы, салт-дәстүр, жөн-жоралғылар, ұмытылып бара жатқан кәделеріміз туралы айтқымыз келеді. Мақал-мәтелдер, жұмбақтар – осының барлығы қосымшамызда болуы үшін жұмыс істеп жатырмыз, – дейді жоба авторы Әйгерім Исатаева.
Бұған қоса, Qonzhyq AAP мобильді қосымшасы Астана қаласында БҰҰ-мен серіктесе отырып, қоғамдағы маңызды тақырыптарды қозғайтын жаңаша ертегілердің тұсаукесерін өткізді. Аталған жобаға Qonzhyq App демеушілік жасай отырып, жинақтағы ертегілер дыбысталды. Ертегілердің аудио нұсқасын қосымшадан тегін тындауға болады.
Мобильді қосымшаның басты ерекшеліктерінің бірі – балаларды оқыту тұрғысында түрлі әдісті қолдана білген. Қосымша барлық қолданушыға тегін. Қазақ және орыс тілдерінде пайдалану қолжетімді.
Жанель ҚҰТТЫБАЙ