Катонқарағай ауданында «Ауыл аманаты» жобасы аясында ауылдық округ әкімдері мен азаматтық қоғам өкілдерінің қатысуымен дөңгелек үстел өтті.
«Ауыл аманаты» жобасы халықтың табысын арттыруға бағытталған.
«Жобаның негізгі мақсаты – ауыл шаруашылығы тауарын өндірушілерді жан-жақты қолдау, ауыл тұрғындарын аграрлық бизнеске барынша тарту, азық-түлік қауіпсіздігі және азаматтардың өмір сүру сапасын жақсартуға байланысты мәселелерді шешу», - дейді «Ертіс» ӘКК» АҚ-ның бизнес жобалар және инвестициялар бөлімінің бастығы Аслан Смағұлов.
Кездесу барысында ауылдықтарға жобаның шарттары мен қажетті құжаттар егжей-тегжейлі түсіндіріліп, бөлінген қаражатты тиімді игеру қажеттігі айтылды.
«Ауыл аманаты» жобасы байланысты қандай да бір сұрақтар туындап жатса, әр ауылда ауылдық округ әкімдеріне немесе «AMANAT» партиясының аудандық филиалына хабарласуларыңызға болады», - дейді «AMANAT» партиясының Катонқарағай ауданы филиалының төрағасы Жанар Сыдықова.
«Ауыл аманаты» бағдарламасы бойынша микрокредит мерзімі – 5 жыл, мал шаруашылығы саласындағы жобалар үшін 7 жылға дейін. Ал ең жоғары сомасы 2,5 мың АЕК немесе 8,6 млн теңге. Зәкірлік кооперацияны дамыту үшін 8 мың АЕК немесе 27,6 млн теңгеге дейін. Сыйақы мөлшерлемесі жылдық 2,5%-дан аспайды.