Бұл туралы орталық коммуникациялар қызметінде өткен баспасөз мәслихатында БҚО энергетика және ТҮКШБ басқарма басшысының орынбасары Қанат Өмірәлиев мәлімдеді.
«Қыс шанаңды жаз сайла» демекші, облыстағы коммуналдық мекемелер қысқа дайындықты жаздай жүргізіп жатыр. Үзілген электр сымдары жөнделіп, инженерлік желілер жаңартылуда.
Өңірлік коммуникациялар қызметі алаңында өткен брифингте БҚО энергетика және ТҮКШБ басқарма басшысының орынбасары Қанат Өмірәлиев аймақта жасалып жатқан жұмыстар туралы баяндады.
– Қазіргі уақытта электрмен жабдықтау бойынша 16 қосалқы станса, 976 км электр желісі, 78 кешенді трансформаторлық станса жөндеуден өтті. Ал жылумен жабдықтау бойынша 5,5 км жылу желілері жөнделді. Сондай-ақ инвест бағдарламамен 3,1 км сумен жабдықтау және суды әкету желілері жөнделді, – деді басқарма басшысының орынбасары Қанат Өмірәлиев.
БҚО-да электр желілері 80 пайызға тозғаны туралы аз айтылып жүрген жоқ. Сол тозған желілердің әбігерін халық қыста көреді. Әсіресе, алыс ауылдарда жарық өшуі жиілейтін кездер болады.
Былтырғы қыста Сырым, Шыңғырлау, Теректі аудандары апталап жарықсыз отырған кездері есімізде. Биыл қыста осындай қателіктерді болдырмау үшін Үкімет қаулысымен Батыс Қазақстан облысының кешенді даму жоспары аясында электр желілерін жөндеу және қайта құру жұмыстары үшін бюджеттен үш жылға деп 20 млрд теңге қаржы бөлініпті.
– Бұл ақшаға 2019,5 шақырым электр желілері мен жабдықтарды қайта құру жоспарлануда. 12 жобалық-сметалық құжаттама жасақталып жатыр. Атап айтсақ, 2023 жылы – 6 млрд, 2024 жылы – 7 млрд, 2025 жылы – 7 млрд теңгеге электр желілеріне жөндеу және қайта құру жұмыстары жүргізілетін болады. Биыл республикалық бюджеттен Ақжайық, Бәйтерек, Тасқала аудандары және Орал қаласының аумағында электр желілерін қайта құрылымдау жобасын іске асыруға 1,9 млрд теңге бөлінді. Қазір мердігер мекемелер анықталып, келісімшарттар жасалды, – деді Қанат Өмірәлиев.
Аймақтағы сумен жабдықтау және су бұру желілерін қайта жаңғыртуға бюджеттен 2,8 млрд теңге бөлінсе, «ЖайықЖылуҚуат» акционерлік қоғамның негізі жабдықтары 80 пайызға жөнделген.
Орал қаласының жылу электр орталығын жаңғырту мақсатында градирняны қайта құру жұмыстары аяқталған болатын. Аймақ басшысы өзі арнайы барып, құрылысымен танысқаны есімізде. Бүгінде мамандар осы градирняның арқасында Жайық өзінен алынатын су көлемі азайғанын айтады. Бұрын «ЖайықЖылуҚуат» мекемесіне қажетті техникалық су Жайық өзенінен алынып келген еді.
Жанат ҚАЙЫРҒОЖИНА,
Батыс Қазақстан облысы