Сенаторды музей жетекшісі Райхан Имаханбет «Ахметтану» оқу орталығында қарсы алып, қонақтарға кәдесый жасап, ілтипатын білдірді.
Музей-үйдің сайтында жарияланған хабарландырудан құлақтанған көпшілік Сенат депутатымен жүздесу үшін арнайы келді. Атап айтар болсақ, филология ғылымдарының докторы Орынай Жұбай, доцент Ұлдар Исабекова, әл-Фараби атындағы ҚазҰУ-дың аға оқытушысы Шохан Шортанбай, тілші әрі «Ақиқат» журналы редакторының орынбасары Дина Иманбай, ҚР Ұлттық кітапхананың Сирек қор бөлімінің қызметкері Гүлшат Әбіковалар көкейкесті сауалдарын қойып, депутатпен дидарласты.
Сенат депутаты қонақтармен бірге Ахмет Байтұрсынұлы саябағындағы ғалымның еңселі ескерткішіне тағзым жасағаннан кейін музей-үйге оралып, музей жәдігерлерімен танысты. Қазақ ғылымына еселі еңбек сіңірген арыстар мен зиялылардың ұлықталуы туралы әңгімелесті.
Алтынбек Нухұлы музей-үйдің ұжымына алғысын айта келе, алдағы уақытта жарық көруі тиіс музей-үй жетекшісі Райхан Сахыбекқызымен бірлескен Ахметтану анықтамалығы туралы жобаның дайындығын пысықтады.
Жүздесу соңында іс-шараға келгендерге ғалым өмірін қамтыған кітап сыйға тартылып, ұлт ұстазы портреті алдында естелік суретке түсті.
Әділет АХМЕТҰЛЫ,
Ахмет Байтұрсынұлы
музей-үйі
бөлімінің меңгерушісі