«AMANAT» партиясы жаңа оқу жылы қарсаңында «Баланы мектепке дайындайық!» жалпыреспубликалық қайырымдылық акциясын бастағанын хабарлайды. Игі дәстүрге айналған акция «Бақытты отбасы» партиялық жобасы аясында осымен 13-ші мәрте өткізіліп отыр. Оның басты мақсаты – көпбалалы және аз қамтылған отбасылардағы балаларды жаңа оқу жылына дайындауға көмектесу.
Акцияға партияның Орталық аппараты мен өңірлік филиалдарының қызметкерлері, партия депутаттары, бастауыш партия ұйымдарының мүшелері және ұрпақ болашағына бей-жай қарай алмайтын қарапайым азаматтар қатысады. Ел аумағындағы 45 мыңнан астам бала аманаттықтардан жаңа оқу жылына арналған жиынтықтар алады деп жоспарланып отыр. Яғни, оларға мектеп формасы, оқулықтар мен кеңсе тауарлары салынған рюкзактар ұсынылады.
Мәселен, ШҚО-да «AMANAT» партиясының «Баланы мектепке дайындайық!» акциясы аясында облыстық филиал ғимаратында балаларға оқуға қажетті құрал жабдықтар салынған сөмкелер табысталды.
«Қадірменді бүлдіршіндер, сіздерге жаңа оқу жылы қарсаңында тек жақсылықтар мен оқуда сәттілік тілеймін. Қазіргі заманның талабы – жақсы білім алу. Сондықтан да сабақты тек беске оқыңыздар. Ата-аналарыңыздың үмітін ақтап білімді азамат болып өсулеріңізге тілектеспін», – деді «AMANAT» партиясы фракциясының мүшесі, Шығыс Қазақстан облыстық мәслихатының депутаты Тұрарбек Әзекенов.
Партия бастамасымен өтіп жатқан шараға қатысушылар дән риза. Ана-аналар да, балалар да да ұйымдастырушыларға ризашылықтарын білдіруде.
«Балаларды мектепке дайындау оңай емес. Қазір барлық дүние қымбат. Біздің отбасымызда қатарынан бес бала мектепке барады. Осындай шараларды ұйымдастыру сәлде болса қолдау деп ойлаймын», – дейді Өскемен қаласының тұрғыны Құралай Мажатаева.
Ақтөбе облысында да облыстық мәслихаттағы «AMANAT» фракциясының мүшелері жалпыреспубликалық дәстүрлі қайырымдылық акциясына үлес қосты. Депутаттар 20 балаға оқу құралдарын алып, қаржылай көмек көрсетті. Жаңа оқу жылына дейін аманаттықтар облыстағы 2 мыңнан астам оқушыны мектепке дайындауға қол ұшын бермек. Бұл жолғы көмекті өңірде көпбалалы және әлеуметтік жағынан аз қамтылған отбасылар алды. Бір жанұяда 7 бала болса, енді бірі ата-анасыз қалған балаларды қамқорлыққа алған. Барлығы да балаларына мейірім мен қамқорлық сыйлап, қолдау көрсеткен аманаттық депутаттарға дән риза. Сондай-ақ іс-шараны ұйымдастырған «AMANAT» партиясына да алғысын айтып жатыр.
«Қызымның екі ұлын қамқорлығыма алдым. Үлкені Алматыда университетте оқиды, екіншісі – 7-сыныпқа көшті. Жалғызбасты анаға екі баланы жетілдіру оңай емес. Оның үстіне, 4-5 жылдан бері осы балаларға арнап үй салып жатырмын. Оның қақпасын тұрғызуға да депутаттар көмектесті. Қайырымдылық ісі үшін «AMANAT» партиясына және депутаттарға ризашылығым мол», – деді 63 жастағы Ағила Дилмағамбетова.
Ал Қарашаш Диярованың 7 баласы бар. Жолдасы ІІ топ мүгедегі, өзі бала күтімімен үйде отыр. Оның 4 баласы мектепте оқиды. Сондықтан да көпбалалы ана депутаттардың көмегі үлкен демеу екенін айтты.
«Бақытты отбасы» партиялық жобасы аясында ұйымдастырылған акцияға барлық деңгейдегі депутаттар атсалысып жатыр. Қазірдің өзінде облыстық мәслихат депутаттары Талғат Салфиков, Сергей Прокопьевтың әрқайсысы 300-ден астам оқушыға қажетті құрал-жабдықтар мен киім-кешектер сыйлады. Акция аясында облыстағы 2 мыңнан астам оқушыны қамту көзделіп отыр.
«AMANAT» партиясының «Бақытты отбасы» партиялық жобасының аясында «Балаларды мектепке дайындайық!» акциясына өзге өңірлердегі партияластар да белсенді қатысуда. Павлодар облысында бүгінгі таңда көмекке мұқтаж жандардың тізімі анықталған. Бірінші кезекте көмек ерекше қажеттіліктері бар балаларды тәрбиелеп отырған отбасыларға және асыраушысы жоқ балаларға үйлестіріледі. Акция аясында депутаттық фракцияның мүшесі, облыстық мәслихаттың депутаты Гнел Акопян жоғарыда аталған санаттағы балаларға мектеп керек-жарақтары мен сертификаттарды табыстады. Гнел Мартиросович балаларға оқуды жақсы оқып, болашақтарының жарқын болуына ақ тілегін жеткізді.
Айта кетейік, «Халықпен бірге!» сайлауалды бағдарламасы аясында алдағы бес жылда партия кемінде 1,2 млн ыңғайлы оқушы орнын құруды, сондай-ақ үш ауысымды және апатты жағдайдағы мектептер мәселесін толығымен шешуді көздейді. Жөндеуді және заманауи жабдықтармен қамтамасыз етуді қоса алғанда, еліміздегі үш мың мектеп толықтай жетілдіруден өтеді. Былтыр аманаттықтар 23 мыңнан астам отбасындағы 42 мың оқушыны мектеп формасымен, рюкзактармен және кеңсе тауарларымен қамтамасыз етті.