Алматы қаласы әуежайында желілік полиция бөлімінің қызметкерлері 17 жастағы атыраулық жасөспірімге ұшақ бортында темекі шеккені үшін айыппұл салды.
Көліктегі полиция мәліметінше, Air Astana әуекомпаниясының "Атырау – Алматы" бағытындағы әуе рейсі ұшып келгеннен кейін Алматы қаласы әуежайындағы желілік полиция бөлімінің қызметкерлері әуе кемесі командирінің актісі бойынша құқық бұзушыны түсіріп алды.
"Ол - ұшу кезінде әуе кемесінің дәретханасында темекі тұтынған Атырау қаласының 17 жастағы тұрғыны. Аталған құқық бұзушы заңды өкілдерінің қатысуымен ҚР ӘҚБтК-нің 441-бабының 1, 2-бөлігімен әкімшілік жауапқа тартылып, оған 10 АЕК (34 500 теңге) айыппұл түрінде әкімшілік жаза қолданылды", – делінген хабарламада.