Бірінші мектеп – 1 500 орындық мектеп-гимназия жеке инвестиция есебінен салынды. Мектеп құрылысы 2022 жылы басталған, пайдалануға 2023 жылдың тамыз айында берілді. Мектеп толық жабдықталған, оқу кабинеттері қажетті компьютерлік жабдықтармен қамтамасыз етілген. Ғимаратта 360 орындық асхана, 280 орындық акт залы, екі спорт залы, төрт информатика кабинеті, музыкалық аспаптар кабинеті, буфет, кітапхана, үш кітап қоймасы, сондай-ақ гимназияда (қыш шеберханасы, роботтехника, фотостудия кабинет сияқты) арнайы кабинеттер бар. Бұдан бөлек, химия, физика, биология, технология кабинеттері барлық қажетті жабдықтармен толық қамтылған. Оқу кабинеттері санитарлық талаптарға сәйкес мектеп жиһаздарымен жабдықталған. Мектеп аумағында футбол және баскетбол алаңы бар.
Екінші жаңа мектеп – мемлекеттік тілде білім беретін 1 200 орындық білім ордасы. Ғимарат үш қабаттан, алты блоктан тұрады. Оқу кабинеттерінің саны – 50. Химия, физика, биология, технология кабинеттері, қажетті жиһазбен толықтай жабдықталған. Оқу ордасында 384 орындық асхана, 600 орындық акт залы, ауданы 520 шаршы метр спорт залы, металл, ағаш, мата өңдеу шеберханалары, алғашқы әскери дайындық кабинеті бар. Мектеп аумағында футбол және баскетбол алаңы да қарастырылған.
Айта кетейік, жаңа 2023–2024 оқу жылының басында 7 мектепке Қосшы қаласы бойынша 10 809 оқушы барады. Жалпы, биыл 1 қыркүйекте Ақмола облысы бойынша партияның сайлауалды бағдарламасы аясында 5 мектеп пайдалануға берілді. Олар Көкшетау және Қосшы қалаларында, Өтеміс және Жібек жолы ауылдарында орналасқан.