Жалпы отырыста депутаттардың бастамасымен әзірленген «Жер қойнауы және жер қойнауын пайдалану туралы» Кодекске түзетулер енгізу туралы заң жобасы бірінші оқылымда ұсынылады.
Бұл заң жоба жер қойнауын пайдалануға арналған келісімшарттар жасау және базалық жобалау құжаттарына мемлекеттік сараптама жүргізу рәсімдерін оңтайландыруға, жер қойнауын пайдаланушылардың қаржылай және әкімшілік шығындарын азайтуға бағытталған.
Сонымен қатар депутаттар экспорттық-кредиттік агенттік және шикізаттық емес тауарлардың (жұмыстардың, көрсетілетін қызметтердің) экспортын ілгерілету мәселелері туралы заң жоба бірінші оқылымда және «Еуразиялық қайта сақтандыру компаниясын құру туралы келісімді ратификациялау туралы» заң жобасын талқылайды.
Палата комитеттері бірқатар ратификацияланатын құжатты жұмысқа қабылдайды. Олар: Тәуелсіз Мемлекеттер Достастығына қатысушы елдердің аумақтарын санитариялық қорғау саласындағы ынтымақтастық туралы келісім және Қазақстан мен Қытай үкіметтері арасындағы мемлекеттердің азаматтарына қатысты ақпарат алмасу туралы келісім.
Сондай-ақ күн тәртібінің жобасында VIII сайланған Қазақстан Республикасы Парламенті Мәжілісінің өкілеттіктерін іске асырудың екінші сессияға арналған негізгі іс-шаралар жоспары бар.