Арнайы комиссияның су басудан келген шығынды өтеуге сараптама нәтижелері мен сметалық есептердің қорытындысына сай бюджеттен 403,5 млн теңге бөлініп, оның 216,8 млн теңгесі 22 үй сатып алуға, 186,7 млн теңгесі 83 үйге ағымдағы және күрделі жөндеу жүргізуге қарастырылған.
Ескелді ауданы әкімдігінің деректеріне қарағанда, жобалық-сараптамалық және сметалық ұйыммен бірлесіп, су басу салдарынан келтірілген залалды бағалау жұмыстары жүргізілген. Жалпы, ауданның ауылдық елді мекендерінде – 105 үй, соның ішінде Абай ауылында – 11, Ешкіөлмес ауылында – 28, Қарабұлақ ауылында 66 үй зардап шеккені анықталыпты. Бүлінген үйдің 22-сі бұзылады, 83-і ағымдағы және күрделі жөндеуден өткізіледі.
«Бүгінгі күні аудан әкімдігі 7 үй сатып алды, үйлері бүлінген тұрғындар осы сатып алынған баспаналарға қоныстанып жатыр, қалған 15 үйді сатып алу рәсімдері жүргізілуде. Сондай-ақ қалпына келтіру қажет деп тапқан 83 үйдің иесіне төлем жасалуда. 21 қыркүйектегі мәліметке сәйкес қалпына келтіру жұмыстарын жүргізу үшін 76 үйдің иелеріне 173,1 млн теңге төленді. Бұл бағыттағы жұмыстар әлі де жалғасып жатыр», – деді аудан әкімдігінен.
Сонымен қатар тасқын болған ауылдардағы көшелерді тазалау, бүлінген тұстарын қайта қалпына келтіру жұмыстары жүргізілуде. Қыркүйек айының соңына дейін жалпы ұзындығы 12,7 шақырым болатын 7 көшеге жалпы сомасы 688,1 млн теңгеге орташа жөндеу жұмыстарын аяқтау жоспарланып отыр. Бүгінде 4 көше толығымен реттеліп, 3 көшеде жұмыстар жалғасуда.
Сондай-ақ жалпы сомасы 8,7 млн теңгеге Абай ауылындағы Бақтыбай көшесі мен Ешкіөлмес ауылындағы М.Тынышбаев көшесіне жарық орнатылуда. Көшелердің жалпы ұзындығы – 3 шақырым. Бұл жұмыстар осы жылдың қыркүйек айының соңына дейін аяқталуға тиіс.
Болат АБАҒАН,
Жетісу облысы