Биылғы жаздың ыстық болғаны орман алқабына кәдімгідей қауіп төндірді. Аптап ыстықтан дала өрті көбейіп, төтеншеліктер бірнеше рет атқа қонғаны есімізде. Әсіресе, Сырым, Теректі, Тасқала, Казталов аудандарындағы дала өртін сөндірумен төтеншеліктер күндіз-түні айналысты.
– Биыл 14 табиғи өрт тіркелді. Соның жетеуі орман өрті. Биылғы ауа райының құбылмалы болуы дала өртін сөндіруде қиындық туғызды. Бірақ біз бар күш-жігерімізді салып, орман алқаптары мен елді мекендерді өрттен сақтап қала алдық, – дейді БҚО Төтенше жағдайлар департаментінің бастығы Ернұр Өтегенов.
Бұл оқу-жаттығу жұмыстарына 131 адам, 38 техника, бір тікұшақ, екі жүзу қайығы тартылып отыр. Мұндай оқу-жаттығу жұмыстары өрт сөндірушілер мен орманшылардың ширақтығы мен кәсібилігін шыңдау үшін ұйымдастырылады.
Департамент басшысы өрт сөндірушілердің техникалық базасы жаңартылып жатқанын да айтты.
– Биылғы жылға республикалық бюджеттен 4 автокөлік берілуде. Облыс әкімінің қолдауымен біздің өрт сөндіру бөліміне деп 7 автокөлік дайындалуда. Бұдан басқа, өрт сөндірушілердің киім-кешектері мен байланыс құралдарына деп бюджеттен қаражат бөлініп, қазір қажет заттарды алып жатырмыз, – деді Ернұр Өтегенов.
БҚО – орман алқабына бай өңір. Облыста 216 мың 815 гектар орман алқабы бар. Осы байлықты қызыл жалыннан сақтап қалу үшін орманшылар мен өрт сөндірушілер аз тер төгіп жүрген жоқ.
Президент Қасым-Жомарт Тоқаев өрт сөндірушілер мен орманшылардың техникалық базаларын күшейтуді, жалақыларын көтеруді тапсырған болатын. Бұл тапсырма аясында облыста біраз жұмыс атқарылуда.
– Президент тапсырмасына сәйкес және облыс әкімінің тікелей қолдауымен облыстық бюджеттен 1 миллиард 187 млн қаржы бөлінді. Оған біз 25 трактор, 13 автокөлік, 78 қажетті құрал алдық. Кейін облыстық бюджеттен 78 млн қаржы бөлініп, оған 420 рация және 135 аспалы су шашқыш, 6 өрт сөндіруге арналған кешенді көлік, 4 дрон алынды. БҚО бойынша өртті бақылауға арналған 8 мұнара бар. Сол сегіз мұнараға видеокамера қойыл-ды, – деді облыстық Табиғи ресурстар және табиғатты пайдалануды реттеу басқармасының басшысы Қуанышқали Исимов.
Жанар ҚАЙЫРҒОЖИНА