Салдарынан мамандардың саны азайып барады. Мәселен, орман және ағаш кесу саласында орташа жалақы 120-дан 140 мың теңгеге дейін ғана. Өсімдік шаруашылығы мен мал шаруашылығы саласында 180 мың теңгеге жуық айлық алады. Бұл елдегі орташа жалақыдан төмен.
Сол сияқты жуырда шымкенттік мал дәрігерлері жалақының аздығына наразылық білдірді. Олар бар-жоғы 109 мың теңге жалақы алады екен.
Мал дәрігерлері Шымкент қаласын мегаполис болғанымен халқының жағдайы жақсы деп айта алмайтынын жеткізді. Бір топ мал дәрігері жиналып, осылайша өкпе-ренішін жеткізді. Мал дәрігері Ержігіт Байданов «өзге мегаполистермен салыстырғанда шымкенттік мамандардың айлығы өте төмен» дейді. «Айлықты айлыққа жеткізе алмай, несие алып отбасын бағуға мәжбүрміз» деп ашынды.
Айта кетейік, үшінші мегаполистегі ветеринария бөлімінде 85 дәрігер жұмыс істейді. Олар «қаңғыбас» жануарларды тексереді, егу жұмыстарымен айналысады, жануарлар сырқаттанса емдеп, аурудың алдын алу шараларымен айналысады. Бүгінде мал дәрігелеріне сұраныс бар, бірақ оларға медициналық жәрдемақы немесе басқа да төлемдер қарастырылмаған. Мал дәрігерлері 109 мың теңге жалақыдан артық емделуге арналған ешқандай медициналық жеңілдіктің де жоқ екенін жеткізді. Денсаулыққа қауіпті, вакцина егу жұмыстары да осынау мамандардың мойнында. Сондықтан мал дәрігерлерінің ашынатынындай жөні бар. Болмашы жалақының өзін екі айлап алмай қалатын күндер болады. Мәселен олар тамыз айынан бергі жалақыны әлі алмапты.
Шымкент қалалық ауыл шаруашылығы және ветеринария бөлімі басшысының міндетін атқарушы Ерлан Әденов тамыз және қыркүйек айларының жалақысы жолданып жатқанын, бүгін-ертең қолға түсетінін айтты. Ал жалақының аздығы бойынша ұсыныс енгізіліп, алдағы күндері қалалық мәслихатта қаралмақ. Онда да бұл мәселе келесі жылдың еншісіне қалуы мүмкін.
Қалай болғанда да ауыл шаруашылығы саласының маңызды факторы саналатын ет-сүт, азық-түлік өнімдерінсіз күніміз жоқ. Жалақының аздығы маман тапшылығына келіп тіреледі.
Жалпы ветеринарлардың жалақысының аздығы бірнеше уақыттан бері көтеріліп келеді. Тіпті өткен жылы Үкімет сағатында да сол кездегі Ауыл шаруашылығы министрі Ербол Қарашөкеев бұл мәселені көтерген. «Ветеринарлардың жалақысы төмен, ал олардың жұмысы өте қауіпті және олар үнемі үйден тыс жерде, сапарларда болады. Республика бойынша мал дәрігерлерінің орташа жасы – 40-55 жасты құрайды. Өкінішке қарай, жастар ветеринарлардың оқуын оқығысы келмейді. Себебі олардың жалақылары төмен, ал жұмыстың көлемі үлкен», – деген болатын. Одан соң, Ауыл шаруашылығы министрлігі төрт жыл ішінде ветеринарлардың жалақысын кезең-кезеңімен екі есеге арттыруды қамтитын ветеринария жүйесін реформалау бойынша ұйымдастырушылық іс-шаралар жоспарын бекіткенін айтқан. Осынау ақпараттан соң мал дәрігерлері елеңдеп қалған-ды. Алайда одан бері тағы бір жыл сырғып барады. Өзгеріс жоқ.
Назгүл НАЗАРБЕК,
Шымкент қаласы