Шараға жас ақын-жазушылар, Астана қаласы әкімдігінің қызметкерлері, елорда мектептерінің оқушылары мен мұғалімдері және ЖОО студенттері, сондай-ақ арнайы қонақ ретінде жазушының қарындасы Ғалия Бөкейқызы қатысты.
Айта кету керек, жақында Мемлекет басшысы Қасым-Жомарт Тоқаев Мемлекеттік сыйлықтың лауреаты, көрнекті жазушы, драматург Оралхан Бөкейдің 80 жылдығына арналған конференция қатысушыларына жолдаған құттықтау хатында «Оралхан Бөкей – ұлт руханиятының көкжиегін кеңейтуге зор үлес қосқан біртуар тұлға. Қарымды қаламгер әдебиет әлеміне алғаш қадам басқан сәттен бастап шоқтығы биік шығармаларымен оқырман қауымның ықыласына бөленді. Оның «Қайдасың, қасқа құлыным», «Қар қызы», «Ұйқым келмейді», «Атау кере» және басқа да туындылары қазақ әдебиетінің алтын қорына құнды қазына болып қосылды. Жазушының жауһар мұралары көптеген шет тіліне аударылды, пьесалары еліміздің іргелі өнер ордаларында қойылып, көрермен көзайымына айналды. «Алтайдың Кербұғысы» атанған ерекше дарын иесінің шығармашылық жолы, азаматтық ұстанымы және қайраткерлік қасиеті – жастарға әрдайым үлгі-өнеге. Оның мол әдеби мұрасы әлі талай ұрпаққа рухани азық бола беретіні сөзсіз», – деген еді.
Жазушының туған күніне арналған шаралар туған жері Шығыс Қазақстан облысындағы Катонқарағай ауданынан басталып, республика деңгейінде атап өтіліп жатыр. Алдағы уақытта да әр өңірде қаламгердің тағылымды ғұмыры мен шығармашылығына арналған әдеби-мәдени жиындар жыл бойы жалғаспақ.
Бұл үшін қуанышты екенін айтқан жазушының қарындасы Ғалия Бөкейқызы: «Өйткені, Оралхан облыс көлеміндегі емес, әлемдік деңгейдегі қазақ жазушыларының бірі. Жазушының шығармаларын оқысаңыз сізді сұлу сөздерімен, қаламының қарымымен, дарынымен, суреткерлігімен бірден баурап алады. Бүгінгі кештің ұйымдастырылып отырғаны жастарға көп пайдасын тигізеді. Себебі Оралхан тек суреткерлігімен ғана емес, еңбектеріндегі тағылымды ойлары, өмірден алынған мысалдары жас оқырманды тәрбиелейді деп ойлаймын», – деді.
Сонымен бірге жиында Оралхан Бөкейдің өмірі мен шығармашылығына арналған деректі фильм көрсетілді. Қатысушылар жазушының прозалық, драмалық шығармаларынан үзінділер оқып, өз өнерлерін ортаға салды.
Ұлттық музейдің ғылыми хатшысы Саялбек Гиззатовтың айтуынша, қазіргі таңда кітап оқушы жастардың қатары күн санап көбейіп келеді. Солардың қазақтың дарынды жазушыларын танығанын, шығармаларымен сусындағанын қалайтынын тілге тиек еткен ол: «Оралхан Бөкей ағамызды тек әдебиетке қызығушылық танытып жүрген адам ғана емес, жалпы әр қазақ оқитын қаламгерлердің бірі деп есептеймін. Бүгінгі жиынды ұйымдастырып жатқан себебіміз де осы. Өйткені кештің мақсаты – оқушыларды жазушы Оралхан Бөкейдің өмірбаянымен, шығармашылығымен таныстыру, жастардың көркем шығармаларды оқып-үйренуге ықыласы мен қызығушылығын арттыру», – деп атап өтті.
Ж.МҮСІЛІМ