Осыдан кейін Қазақстан халқына қоры құрылды. Қорды құрудағы мақсат – денсаулық сақтау, білім беру және әлеуметтік қолдау, мәдениет және спорт салаларында мемлекеттік қолдау шараларынан тыс қосымша қайырымдылық көмек көрсету. Елімізде осы қордың көмегімен бірнеше әлеуметтік нысан бой көтеріп, мұқтаж жандарға көмек берілуде.
Батыс Қазақстан облысында ауыр дертке шалдыққан 5 азаматқа 1,1 млрд теңгеден астам сомаға дәрілік заттар алынған. Бұл қордың ең ірі бағдарламасы – өмірге қауіп төндіретін және сирек кездесетін аурумен ауыратын науқастар үшін дәрілік препараттарды сатып алу қағидасы бойынша жасалған жұмыс. Ал екі науқас Ресей мен Түркия еліне жолдамамен ем алуға жіберіліпті. Олардың еміне деп қордан 26,8 млн теңге қаржы төленген. Бұдан бөлек Орал қаласындағы облыстық көпбейінді балалар ауруханасына 66,2 млн теңгеге медициналық жабдықтар сатып алу жоспарлануда. Бұл туралы «Қазақстан халқына» қорының ресми өкілі Диас Бейсенбек мәлімдеді.
Бұдан бөлек БҚО-да алты адамға 44,1 млн теңгеге протез алынған. Ал 241,2 млн теңгеге Ақжайық орталық аудандық ауруханасы базасында 1 оңалту орталығын ашу жоспарланып отырған көрінеді.
«Қазақстан халқына» қорының негізгі бағыты – денсаулық сақтау, білім беру бағытында қолдау көрсету.
Қордың тағы бір негізгі басым бағыттарының біріне білім беру ұйымдарына қаржылай қолдау көрсету жатады.
– Қордың «Болашақ инженерлер» бағдарламасы шеңберінде биыл ауылдық елді мекендерде орналасқан 12 мектепке «Қазақстан халқына» қоғамдық қоры атынан робототехника құрылғылары алынып, үйірмелер ұйымдастырылуда. «QH Болашақ инженерлер моноқалаларда» бағдарламасы шеңберінде Ақсай қаласының №1, 3, 7, 8 мектептерін робототехника құрылғыларымен қамтамасыз ету жоспарлануда, – дейді БҚО Білім басқармасының басшысы Айгүл Мыңбаева.
Бұдан бөлек, осы жоба шеңберінде биыл Бөкей ордасындағы Мұхамед-Салық Бабажанов атындағы жалпы орта білім беретін мектепті, Жәнібек ауданындағы Т.Жароков атындағы жалпы орта білім беретін мектепті, Сырым ауданындағы Қ.Мырзалиев атындағы жалпы орта білім беретін мектепті жабдықтау жоспарланып отыр. Бұл білім беру ұйымдарында ағымдағы жөндеу жұмыстарын жүргізу үшін жергілікті бюджеттен қаражат бөлінген. Қазір екі мектепте жөндеу жұмыстары басталып та кеткен.
Қазақстан халқына қорының арқасында «Жаздық сауықтыру және демалыс жолдамасы» әлеуметтік жобасы аясында 895 бала Еуразия туристік сауықтыру кешенінде демалған.
– Алдағы жылдары облыстың білім саласына қатысты 4 жоба ұсынып отырмыз. Бұлар – ауылдық елді мекендердегі 24 мектептің материалдық-техникалық базасын жаңарту, мектептердің спорттық құрылғыларын жаңарту, мектеп автобустарын сатып алу, саз мектептерінің музыкалық аспаптарын жаңарту. Қор есебінен қаражат бөлініп, аталған жобалар жүзеге асса облыстың білім саласының дамуына елеулі үлесін қосар еді, – дейді білім басқармасының басшысы Айгүл Әділгерейқызы.
Бұдан бөлек, 2022-2023 оқу жылында халықтың әлеуметтік осал топтарынан шыққан 2 мыңнан астам студент білім беру гранттарының иегері атанған. Соның ішінде БҚО бойынша төрт студент Жәңгір хан атындағы Батыс Қазақстан аграрлық-техникалық университетінде, 25 студент Батыс Қазақстан инновациялық-технологиялық университетінде, 74 студент М.Өтемісов атындағы Батыс Қазақстан университетінде, 6 студент М.Оспанов атындағы Батыс Қазақстан медициналық университетінде оқиды.
– Жастарды спортқа баулу, бұқаралық спортты дамыту мақсатында қордың көмегімен спорт кешендері көптеп салынатын болады. Бір ғана Батыс Қазақстанның өзінде Ақсай қаласында, Ақпәтер, Дарьинск, Бұлан, Қарауылтөбе ауылдарында бес спорт зал ашылды, – дейді «Қазақстан халқына» қорының ресми өкілі Диас Бейсенбек.
Қордың қайырымдылық жобалары мен бағдарламалары қоғам өмірінің маңызды салаларына айтарлықтай әсер етіп отыр. Мемлекет басшысы Қасым-Жомарт Тоқаев қыркүйек айының басында ғана «Қазақстан халқына» қорының төрағасы Болат Жәмішевті қабылдады. Сол кездесуде қор төрағасы осы күнге дейін жасалған жұмыстар туралы баяндады.
Болат Жәмішевтің айтуынша, қор азаматтарымыздың денсаулық сақтау, білім беру, әлеуметтік қолдау, мәдениет және спорт салаларындағы негізгі мәселелерін шешуге бағытталған жалпы сомасы 146,5 млрд теңге болатын 40-тан астам қайырымдылық бағдарлама мен жобаны қаржыландырады. Сондай-ақ төтенше жағдайлар кезінде зардап шеккен азаматтарға көмек көрсетіледі. Қордың бағдарламалары ауылдық елді мекендер мен шағын қалаларға басымдық бере отырып, еліміздің барлық өңірінде жүзеге асырылады.
Жанат ҚАЙЫРҒОЖИНА,
Батыс Қазақстан облысы