Ескекшілер еңсені көтерді
Қоржынымыздағы 3 алтынды да мергендердің салғанын бұған дейін айтқанбыз. Ал төртінші алтынды спорт жанкүйерлері боксшы Сағындық Тоғамбайдан күткен еді. Бірақ ел үміті ақталмады. Бокстан 1/2 финалда жерлесіміз Сағындық Тоғамбай алаң қожайыны Хан Сюэчжэньмен өткен айқаста жеңіліп, «қоланы» қанағат етті. Дегенмен жанкүйерлердің еңсесін ескекшілеріміз көтерді. Қазақстандық ескекшілер Сергей Емельянов пен Тимур Хайдаров каноэда 500 метр қашықтықта сынға түсіп, 1:49.010 көрсеткішпен мәре сызығын бірінші болып қиды. Жапониялық, ирандық ескекшілер екінші, үшінші орында. Осылайша, Қазақстан қоржынына төртінші алтын түсті.
Ал байдарка мен каноэде есуден Қазақстан әйелдер құрамасының өкілдері екі күміс медаль жеңіп алды. 500 метр қашықтыққа каноэде жұптық есуден командалық сайыста Руфина Искакова мен Мария Бровковая қазақстандық дуэті қытайлықтардан ғана ұтылып, күміс жүлдеге ие болды. Тайланд елінің есушілері қола жүлде алды. Дәл осындай қашықтықтағы қос байдарка жарысында Ольга Шмелева мен Ирина Подойникова да Қытайдан кейін екінші орын алса, Өзбекстан құрамасы қола жүлдегер атанды.
Тағы бір күміс медальді күрес спортының құраш түрінен Бекәділ Шаймерденов иеленді. 81 келіге дейінгі салмақ дәрежесіндегі финалдық белдесуде отандасымыз өзбекстандық Үмид Есановқа есе жіберді. Бұл – Қазақстан құрамасының осы Азиададағы жетінші күміс жүлдесі.
Мергендер медальмен жарысуда
Стенд атудан Қазақстан құрамасының мүшелері Қытайдағы ойындарда тағы да жүлдегер атанды. Трап бағдарламасы бойынша командалық сайыста әйелдер құрамасы (Мария Дмитриенко, Айжан Досмағамбетова, Анастасия Прилепина) 3-орын алды. Жарыс нәтижесі бойынша бірінші орынды 337 ұпаймен Үндістан, екінші орынды 336 ұпаймен Қытай еншіледі.
Айта кету керек, дәл осы сайыстан Қазақстан командасы 2014 жылғы Азия ойындарында чемпион атанған еді. Ал Мария Дмитриенко 2014 жылы – алтын, 2018 жылы жеке сайыста қола алған болатын. Осы жолы Мария стенд ату бойынша жеке сында 34 ұпай жинап, қола олжалады. Қытай өкілі Синьцю Чжан 47 ұпаймен жеңімпаз атанды. Осы нәтижесі арқылы ол Азия өңірінің және Азия ойындарының рекордын орнатты. Екінші сатыға 43 ұпай жинаған Цуйцуй Ву көтерілді.
Ал ел құрамасына 37-ші медальді батут гимнастикасынан Виктория Бутолина салды. Ол үздік үштікті түйіндеп, 52,600 ұпаймен қола жүлдеге ие болды. Алтын медальді қытайлық Жу Сюэ Ин (56,720), күмісті оның отандасы Ху Йичэн (55,790) жеңіп алды. Бұған дейін Виктория іріктеуде төртінші орын алған еді.
Азия ойындарында жүлде алмаса да, Париж олимпиадасына жолдама жеңіп алған спортшыларымызды да атап өткеніміз жөн болар. Боксшы Карина Ибрагимова Азия ойындарының 1/4 кезеңінде моңғол спортшысы Намуун Монхорды 5:0 есебімен ұтып, жартылай финалға өтті. Сондай-ақ ол бокстан Парижге алғашқы жолдаманы жеңіп алды. 27 жастағы қазақстандық боксшы әлем чемпионатының үш дүркін жүлдегері, 57 келі салмақ санатында өнер көрсетеді. Ал боксшы Наталья Богданова 66 келіге дейінгі салмақ дәрежесінің ширек финалында Моңғолия өкілі Цэцэгдари Мягмарсурэнмен жұдырықтасып, төрешілердің бірауыз шешімімен жеңіске жетті. Осылайша, ол құрлық біріншілігінің жартылай финалына шығып, өзін кемінде қола жүлдемен қамтамасыз етті.
Айта кету керек, бокстан ұлттық құраманың капитаны Асланбек Шымбергенов жартылай финалға өтті. 71 келі салмақ дәрежесіндегі отандасымыз Асланбек Шымбергенов Өзбекстаннан келген әлем чемпионы Асахуджа Муйнхуджаевты үшінші раунд барысында үш рет нокдаунға жіберіп, 1/2 финалына жолдама жеңіп алды.
– Бірінші, екінші раунд ұтса да, жеңіс арғы жаққа кетіп жатты. Бірақ екінші раундтан кейін «Қобалжыма, өз тірлігіңді істей бер. Кім біледі, нокаутқа жіберетін шығарсың» деп айтқан едім. Бапкерді тыңдады, өзі де риза болып тұр. Бұл жерде қобалжып, қателессең, оған жақсы болады. Салқынқанды болып, баспен жұмыс істесең, жеңісті солай аласың, – деді бокстан Қазақстан құрамасының бас бапкері Мырзағали Айтжанов.
Осылайша, спортшыға әділетсіздік жасағысы келгендердің жоспары орындалмады. Енді құрама капитаны финалда тағы бір әлем чемпионы, жапониялық Севон Окадзавамен жұдырықтасады.
Кербез ЕСІМ