Облыс әкімі Бейбіт Исабаев та арнайы келіп, болашақ ұрпақты білім нәрімен сусындатып жүрген жандарды атаулы мерекемен құттықтап, бірқатар ұстазға марапаттар тапсырды. «Жетісу ұстазы» байқауының жеңімпазына автокөлік сыйға тартылды.
Қонақтар Мәдениет сарайының фойесіне қойылған «Жеңімпаздар аллеясы» атты көрмемен танысты. Ал салтанатты шараның сахнасы «Білім әлеміне жол» тақырыбындағы әдеби-театрлық композициямен ашылды.
Мұғалімдерді кәсіби мерекемен құттықтаған облыс басшысы педагогтердің қоғамдағы рөлі жайлы қысқаша айтып, саладағы атқарылған істер мен алдағы кезге белгіленген жұмыстардан хабардар етті.
– Мұғалімдік – адамның жүрек қалауымен келетін аса мәртебелі мамандық. Педагог болашақ азаматтарды ғана емес, бүкіл қоғамды тәрбиелейді. Ұғымтал ұрпақ, зерделі жас, адал азамат ұстаздың тәлім-тәрбиесімен қалыптасады. Соңғы жылдары мұғалімдердің қоғамдағы мәртебесі заң жүзінде айқындалып, жалақысы едәуір өскенін жақсы білесіздер. Биылғы оқу жылының басынан балабақша тәрбиешілерінің де еңбекақысы 30 пайызға көтерілді. Бұл – балалардың алаңсыз білім алуына, мұғалімдердің әлеуметтік, моральдық және материалдық жағдайын жақсартуға мемлекеттің ерекше назар аударып отырғанының айқын айғағы, – деген облыс басшысы мерекеге орай ардагер ұстаздар мен бүгінгі күні дарынды шәкірттер тәрбиелеп жүрген озат мұғалімдердің бірқатарының есімін айрықша атап өтті. Осыдан біраз ғана бұрын Президент Қасым-Жомарт Тоқаевтың еліміздің жеті мұғаліміне «Қазақстанның еңбек сіңірген ұстазы» құрметті атағын бергенін, сол қатарда Талдықорғандағы №19 мектептің қазақ тілі мен әдебиеті пәнінің мұғалімі, 40 жылдан астам білім саласында еңбек етіп келе жатқан Светлана Исаеваның да болғанын мақтанышпен мәлімдеді.
Облыс әкімі Мемлекет басшысының күні кешегі Республикалық педагогтер съезінде айтқан басты бағыттарына да ерекше тоқталып, жіліктеп түсіндіре кетті. Атап айтқанда, педагогтерге қысым көрсетуді тоқтату, қайта ата-ана, мектеп, жалпы қоғам тарапынан қолдау көрсету, балаларды игі бастамаларға талпындырып, инновациямен жұмыс істейтін мұғалімдердің жетістіктерін насихаттау, кәсіби шеберлігі мен озық тәжірибесін кеңінен тарату туралы тарқата айтты.
Салтанатты жиында озат педагогтерге облыс әкімінің Құрмет грамотасы және Алғысхаты, Оқу-ағарту министрлігінің салалық марапаттары тапсырылды. Самархан Абдилдинов, Майра Ақанбаева, Заир Атабаев, Ләззат Базарқұлова, Парида Бекмұратова, Жакен Бершімбекова, Күлшар Букабаева, Бақытгүл Кәрібекова, Күлжамал Көптілеуова, Махаббат Чуйкенова, Несіпбала Молдабекова сынды бүкіл ғұмырын білім саласына арналған ұстаздар «Еңбек ардагері» медалімен марапатталды. Облыстық «Үздік сынып жетекші» байқауының жеңімпазы Панфилов ауданы Ш.Уәлиханов атындағы орта мектебінің 9-сынып жетекшісі Жанар Кегенбаева 1 млн теңгелік сертификатқа ие болды. Сонымен бірге «Үздік балабақша», «Үздік ауыл мектебі», Үздік кәсіптік білім беру ұйымы», «Үздік қосымша білім беру мекемесі» байқауларының жеңімпаздары болып танылған қараталдық «Балбөбек» балабақшасына, Көксу ауданындағы Жетіжал орта мектебіне, Талдықорған жоғары политехникалық колледжіне, көксулық «Өнер мектебіне» 1 миллион теңгенің сертификаттары табыс етілді. Ал «Жетісу ұстазы» байқауының жеңімпазы атанған Сарқан ауданы №1 мектеп-гимназиясының биология пәнінің мұғалімі Іңкәр Рахмановаға автокөліктің кілті берілді. Саналы ғұмырын білім саласына арнаған әулеттер арасында өткен облыстық «Ұстаздар әулеті» байқауының жеңімпазы болған кербұлақтық Байғалық әулеті «Ұлағат жолындағы ұстаздар» аталымы бойынша, талдықорғандық Жапақовтар әулеті «Ұстаздықты ұлық тұтқан әулет» аталымы бойынша, жаркенттік Үмбетовтер әулеті «Өмірін ұстаздықпен өрнектеген әулет» аталымы бойынша марапатталып, әрқайсысы 200 мың теңгенің сертификатына ие болды.
Еңбегіне қарай ел ықыласына бөленгендердің мерейлі сәтінен кейін Астана қаласында өткен Республикалық педагогтер съезінің делегаты, №28 ІТ лицейі қазақ тілі мен әдебиеті пәнінің мұғалімі Индира Байғожина сөз алып, ұлағат пен ұстаз тұрғысында тағылымды ой қозғап, әріптестері атынан жылы лебіз білдірді. Мемлекет басшының ұстаздардың мәртебесін көтерудегі ерекше қолдауы туралы атап өтіп, Республикалық съезд делегаты ретінде алған әсерін жеткізді. Жетісу облысының «Үздік педагогтер» қауымдастығының білімді ілгерілетуге бағытталған жоспарлары жайлы баяндап, көпшілікті кәсіби мерекемен құттықтады.
Салтанатты шара соңы облыс өнерпаздарының концерттік бағдарламасына ұласты.
Жалпы, облыста білім беру саласын қолдау жылдан жылға жақсарып келеді. Биыл осы саланың бюджеті 109 млрд теңгеге жетті. Оның 3,7 млрд теңгесі білім нысандарының материалдық-техникалық базасын нығайтуға, ауылдық мектептерді қайта жаңғыртуға жұмсалып отыр. Қазір өңірдің білім саласында 20 мыңға жуық педагог еңбек етеді, соның 2 758-і – мектепке дейінгі білім беру мекемелерінде, 15 316-і – мектептерде, 1 329-ы техникалық кәсіби білім беру мекемелерінде жұмыс жасайды.
Болат АБАҒАН, Жетісу облысы