Биыл іргетасы қаланғанына 55 жыл болған қаладағы тұрғын үй қорын жаңарту халықтың өмір сүру деңгейін жақсартудың маңызды міндеттерінің біріне айналып отыр. Өйткені мұндағы тұрғын үй қорының апатты жағдайы мен әбден тозығы жетуі күн тәртібінен түспей тұр. Мұндай жағдайда тұрғын үйді жаңғырту мәселесі бірінші орынға шығады.
2022 жылдан бастап Жаңаөзенде 2020–2025 жылдарға арналған «Нұрлы жер» мемлекеттік тұрғын үй-коммуналдық даму бағдарламасына сәйкес, тұрғын үй қорын жаңарту бағдарламасы жұмыс істейді. Осы мақсаттарға бюджеттен 1,2 млрд теңге бөлінді. Қазір Жаңаөзен қаласында 262 көпқабатты үй бар, оның 232-сі 1960–1980 жылдар аралығында салынған. Ағымдағы жөндеу жұмыстары аясында оyың екеуі апатты деп танылып, 200-ден астам тұрғын басқа үйлерге көшірілді.
Сонымен қатар қалада күрделі жөндеуді қажет ететін 52 тұрғын үй бар. Қазір оның 15-і «Нұрлы жер» бағдарламасы есебінен жөнделді. Ал қалған 37 ғимарат үшін кезең-кезеңімен қалпына келтіру жұмыстары жоспарлануда. Бұл шаралар қала тұрғындары үшін үй жағдайын жақсартуға бағытталған. Сондай-ақ Жаңаөзенде 40 ескі үй бар, олардың қазіргі жағдайын анықтау үшін сараптамалық бағалау жүргізуге жіберілді. Талдау нәтижесі белгілі болған соң апатты деп танылған ғимараттар бұзылып, қалғаны күрделі жөндеуден өтеді.
Жаңаөзен тұрғындарын толғандыратын тағы бір мәселе – су тапшылығы. Қалада жазда – орташа есеппен тәулігіне 42 мың текше метр, ал қыста тәулігіне 30 мың текше метрге дейін су беріледі. Бұл мәселені шешу үшін 2025 жылға дейінгі кешенді даму жоспары шеңберінде қуаттылығы тәулігіне 50 мың текше метр теңіз суын тұшыту зауытын іске қосу жоспарланған. Сонымен қатар қалада 2023 жылдың соңына дейін сумен жабдықтау, кәріз жүйелерін қайта құру және кеңейту жоспарлануда. ТҮКШ инженерлік жүйелерін жаңарту сумен жабдықтау сапасын жақсартуға мүмкіндік береді.
Халықпен алты сағаттық кездесуде тұрғындар әкімге жұмыспен қамту, медициналық қызмет сапасы, бизнесті дамыту, ескі көппәтерлі үйлерге күрделі жөндеу жүргізу сияқты түрлі сұрақтар қойды. Есепті кездесуге қатысқандардың кейбірі тұрғын үй алуға жәрдемдесу, сондай-ақ мұнай-газ саласына жұмысқа орналастыру туралы өтініш жасады. Нұрлан Ноғаев халықтың туындайтын барлық мәселесін қолданыстағы заңнама шеңберінде шешу қажет екенін атап өтті.
– Президент Қасым-Жомарт Тоқаев өз Жолдауында мемлекеттік органдардың жұмысында әділдік пен ашықтық қағидаттарын басшылыққа алудың маңыздылығын білдірді. Ол халықта туындайтын барлық мәселе, соның ішінде жұмысқа орналасуға және ауызсуға қол жеткізуді қамтамасыз етуге байланысты мәселелер қолданыстағы заңнамаға сәйкес қатаң шешілуі тиіс екеніне ерекше назар аударды. Мұнай-газ саласына жұмысқа орналасуға келетін болсақ, мен келісілген алгоритмнің талаптарын сақтамай, барлығын, тіпті кезексіз ұйымдастырудың мүмкін еместігі туралы бірнеше рет айттым.
Біз әрқашан ашық диалог құруға дайынбыз. Алайда осы тұста менің атап өткім келетін мәселе – тек мұнай өнеркәсібінде ғана емес, басқа салаларда да қызмет атқару мүмкіншіліктерін қарау керек. Мәселен, көптеген тұрғындарымыз дәрігерлердің тапшылығы туралы айтады, осы мәселені шешу үшін мемлекет көптеген гранттар бөліп, тегін білім беруде. Сондай-ақ бизнеспен айналысамын дейтін жандарға мемлекеттік қолдау шараларына кепілдік береміз. Сонымен қатар болашақта жасыл энергетика, ауыл шаруашылығын дамыту және басқа да көптеген жаңа салаларда мүмкіндіктер өте көп, – деді Маңғыстау облысының әкімі.
Есепті кездесу аяқталған соң, Нұрлан Ноғаев Жаңаөзен қаласының 88 тұрғынын қабылдады. Ал үш күндік іссапар барысында аймақ басшысы жалпы есепте 145 тұрғынмен жеке кездесіп, мәселесін тыңдады.
Сағындық РЗАХМЕТОВ,
Маңғыстау облысы