Депутат, «AMANAT» партиясы фракциясының мүшесі Нартай Сәрсенғалиев Мәжіліс отырысында микротия және атрезия патологиясына шалдыққан балалардың мәселесін көтерді. Осы жағдайды назарға алуды сұрап, Премьер-Министрдің орынбасары Тамара Дүйсеноваға сауал жолдады, – деп хабарлайды Aikyn.kz.
Мәжіліс депутатының сөзіне сүйенсек, Қазақстанда 3 мың бала микротия және атрезия патологиясына шалдыққан.
«Құлақсыз туылып, қоғамнан қағажу көріп, тәрбиесіз, тәртіпсіз қатарластарының мазағына тап болып, төрт қабырғаға өз еркімен қамалған микротия және атрезия диагнозы қойылған балаларды биліктің қалай өзекке тепкенін айтайын. Біріншіден, бір құлағы жоқ болып дүние есігін ашқан сәбилер мүгедек боп танылмайды. Зейнетақы алмайды. Біздің елде мүгедектік алу үшін екі құлағың да болмауы керек екен. Қазақ «Баланың ұяты – әкеге, Қыздың ұяты – шешеге» дейді, ал құлақсыз туған бөбектердің жанайқайын естімейтін құлағы бар биліктің ұяты кімге?», – деп күйінді депутат.
Нартай Сәрсенғалиевтің айтуынша, микротия және атрезия патологиясының емі бар. Яғни, құлақтың ішіне ота жасап, есту каналдарын ашып, сыртына табиғи құлаққа ұқсас қалып орнатып береді.
«Бір құлаққа жасалатын операцияның құны былтыр 99 000 доллар болған, биыл 105 200 доллар. 1 ай уақытты алатын реабилитация, барып-келу жолы, жатын орын, тамақ дегендерің аталған ақшаның сыртындағы шығын. Естімейтін баламның үнін естіртейін деп ата-аналар Үкіметке жүгінген ғой. Мынадай ресми жауап алыпты: «Әлеуметтік медициналық сақтандыру қоры» КЕАҚ деректері бойынша микротия және атрезия патологиясы бар балалар бюджет қаражаты есебінен шетелге емделуге жіберілетін балалар санатына жатпайды және медициналық көмек сапасының мониторингі департаментінің «Мұқтаж пациенттер» тізіміне енгізілмейді».
«Жас бала құстың көлеңкесінен тоңады» дейтін қазақпыз. Әлгіндей жауаптарды алғанда құлақсыз туған баланың жаны қалай жаурайды десеңізші? Шырылдаған ата-аналар ақырында «Қазақстан халқына» қорына барыпты. Бірақ Қор да қор қылып қайтарыпты. «Бізде бұл мақсатқа ақша қарастырылмаған» деген суық, суыт жауап берген. Қазақстанда аталған дертті емдейтін маман жоқ, әйтпесе естімейтін баласының жанайқайын билікке естірте алмай жүрген ата-ана Америка асып қайтсін? Бұл тек ресми тіркелген 3 000-нан астам баланың әке-анасының жанайқайы, науқас ретінде тіркелмегендері тіптен көп», – дейді депутат.
Депутат Нартай Сәрсенғалиев аталған мәселені шешуге қатысты бірнеше ұсынысын білдірді.
- Микротия және атрезия патологиясына шалдығып, бір құлақсыз туған балаларға да мүгедектіктің берілуін қамтамасыз етуіңіз сұраймын.
- «Қазақстан халқына» қоры арқылы аталған дертті емдеу үшін балалардың АҚШ-қа баруын қамтамасыз етулеріңіз қажет, тиісті қаржыны бөлу керек. Шешімді жедел қабылдау шарт, себебі бұл дерт балалардың екінші сау құлағының есту қабілетін нашарлатып жатыр.
- Қазақстандық білікті дәрігерлерді микротия және атрезия патологиясын емдеудің тәсілдерін меңгеру үшін АҚШ-қа оқуға жедел жіберу керек. Дәрігерлердің өзі ықылас білдіріп отыр. Құлақсыз туған, естімейтін балапандардың жанайқайын құлағы бар билік өкілдерінің еститін кезі келді ғой.