Аты айтып тұрғандай, мұнда бас қосқан кеңес мүшелері мәдениет пен өнерді дамытуға арналған мәселелер төңірегінде көтерілген өзекті жайттарды ортаға салып талқылайды.
Бүгінде Түркістан облысындағы Miras қоғамдық кеңесінің 22 мүшесі бар. «AMANAT» партиясы Түркістан облыстық филиалы атқарушы хатшысының орынбасары, облыстық мәслихат депутаты Қалыйма Жантөреқызы төрағалық ететін кеңеске өңірге танымал Бекжігіт Сердәлі, Бекарыс Шойбеков, Жанахмет Ағыбаев және басқа да зиялы қауым өкілдері, мәслихат депутаттары, мәдениет саласының майталмандары, профессорлар және ғылым кандидаттары енген.
Бүгінде қоғамдық кеңес өңірдегі өнерді дамыту аясындағы жұмыстарға белсене араласып, бірқатар мәселенің шешілуіне түрткі болды.
Жыл басынан бері «AMANAT» партиясы Түркістан облыстық филиалы жанындағы Miras қоғамдық кеңесінің 4 отырысы өткен. Биылғы жылдың алғашқы отырысында қоғамдық кеңестің жаңа құрамы таныстырылып, кеңестің 2023 жылға арналған жұмыс жоспарын бекіту туралы шешім қабылданды. Сонымен қатар «Тұраннан шыққан тұлғалар»: Ахмет Ясауидің туғанына 930 жыл, Сұлтан Бейбарыстың туғанына 800 жылдық мерейтойын облыс көлемінде атап өтудің дайындық жұмыстары мен өткізу барысы талқыға салынды. Кеңес мүшелері тарапынан ұсыныс-тілектер айтылып, мерейтой қарсаңында аталып өтетін іс-шаралар туралы шешімдер анықталды. Осынау шешімнің орындалуы, MIRAS азаматтық қоғамы мен мәдениетті дамыту жөніндегі қоғамдық кеңестің бақылауына алынды.
Екінші отырыста мемлекеттік қызметшілердің мемлекеттік қызметке орналасу кезінде мемлекеттік тіл – қазақ тілін жетік білуі және қазақ тіліне құрметпен қарауды айқындайтын заңнамалық нормативтік-құқықтық норманы «Мемлекеттік тіл» туралы заңына енгізу жайы талқыланды. Сондай-ақ кеңес мүшелері ауылдағы клубтар мен мәдениет үйлерінің, кітапхана мен үйірме жұмыстарын жақсарту бойынша ойларын ортаға салды.
Жиын барысында облыстық Мәдениет және туризм, Адами әлеуетті дамыту, облыстық Денешынықтыру және спорт, Сәулет және қала құрылысы басқармаларының, Қ.Ясауи атындағы Халықаралық қазақ-түрік университеті ректорының есептері тыңдалды. Қоғамдық кеңес отырысының қорытындысымен тиісті шешімдер қабылданды.
Қоғамдық кеңестің кезекті үшінші отырысы Конституция күні мерекесіне арналған «Ата Заң – азат елдің ар-намысы» тақырыбы аясында өрбіді. Жиында Ата Заңды құрметтеу, азаматтарға отансүйгіштікті, ұлтжандылықты насихаттау бойынша әлеуметтік желіде кеңінен ақпарат жариялау мәселесі сөз болды. Кеңес мүшелері айтулы күннің тарихына шолу жасап, өзара пікір алмасты. Сонымен бірге қоғамдық кеңестің келесі отырыстарында қоғамды толғандыратын тақырыптарды көтеру жөнінде ұсыныстар айтылды. Кеңес отырысында айтылған ұсыныстар мен мәселелер назарға алынды.
Қоғамдық кеңес алдағы уақытта да өңірдегі зиялы қауыммен, өнер және мәдениет қайраткерлерімен жалпы қордаланған барлық мәселені шешуге атсалыспақ.
Назгүл НАЗАРБЕК,
Түркістан облысы