«Алғашқы фестивальдың мақсаты – төл мәдениетімізді дәріптеп, ұлттық спортты дамыту. Ұлттық спорт түрлері – тарихымыздың және қазақ халқының өзіндік ерекшелігінің айнасы. Бүгінгі жарысқа қатысуға Ұлытау облысынан ең мықты спортшыларымыз жиналды. Жеңіске лайықтылар жеңеді деп сенеміз. Ұлттық спорт түрлерінен фестивальды келесі жылы қаламыздың 70 жылдық мерейтойында республикалық деңгейде өткізу жоспарланған», – деді іс-шараны ашқан қала әкімі Қайрат Шайжанов.
Фестивальда Жезқазған, Сәтбаев, Қаражал қалаларынан, Жаңаарқа, Ұлытау аудандарынан спортшылар көкпар, асық ату, тоғызқұмалақ, садақ ату, аударыспақ, теңге ілу, арқан тартыс, қазақ күресінен күш байқасты.
Жарыстың жалпы жүлде қоры – 6 млн 800 мың теңге.
Қонақтар мен қатысушылар жергілікті өнерпаздар мен арнайы шақырылған эстрада жұлдызы Ұшқын Жамалбектің өнерін тамашалап, арнайы тігілген киіз үйлерде ұлттық тағамдардан дәм татты.
Спорт түрлерінен жеңімпаздар мен жүлдегерлер мақтау қағаздарымен, медальдармен және бағалы сыйлықтармен марапатталды. Көкпар ойыны бойынша I орынды Жаңаарқа ауданының командасы еншілеп, 1 млн теңгені қанжығасына байлады. II орынды Қаражал қаласы командасы (500 мың теңге), III орынды Жезқазған қаласы мен Байдалы би командалары (300 мың теңге) иеленді.