Абай облысына қарасты Аягөз қаласындағы жерүйлердің бірінде газ баллоны жарылып, бір отбасының 4 баласы қайтыс болды. Бұл туралы журналист Гүлмира Әбіқай Instagram-дағы парақшасында жазды, – деп хабарлайды Aikyn.kz Halyq Uni порталына сілтеме жасап.
«Газ баллоны жарылып, бір үйден 4 бүлдіршін көз жұмды. Баланың үлкені 8 жаста, кішісі енді тәй-тәй басқан. Бұл отбасын жақсы білетін аягөздік оқырмандарымның айтуынша, балалардың әкесі сантехник, анасы жұмыссыз. Аудандық басшылар табысың көп деп мемлекеттен алып отырған атаулы әлеуметтік көмекті кесіп тастапты. Қайран шеше 4 балаға нәпақа болсын деп сүт сатуға үйден шығып кеткен екен. Базарға жүгіріп барып келгенде құлыншақтарының орнын сипап қалды», – деп жазды ол.
Оның айтуынша, қайғылы жағдай 25 қазан күні таңертеңгі уақытта болған.
«Көз алдындағы баладан әп сәтте айырылу деген қандай қиын… ешкімнің басына бермесін. Ананың декреттік уақытын балаға көңіл бөлу орнына нан табуға жүгіртіп қойған қу жоқшылық-ай. Барша оқырманым атынан Аягөз жұртына, қайғы жамылған ата-анаға көңіл айтамын», – дейді ол.
Журналист Аягөз ауданының әкімдігі жағдайды жасыруға тырысқанын айтты.
«4 баланың өлімі жайлы жазған жергілікті блогерлерді қудалап, жазбасын өшіртуін қалай түсінеміз? Бәлкім, енді бұл отбасына табиғи газбен жылитын үй берілетін шығар? Бірақ 4 періштенің әке-шешесін ешкім және ештеңе жылыта да, жұбата да алмайды.
4 періштенің жаназасы 26 қазанда Аягөз орталық мешітінде өтеді», – дейді Гүлмира Әбіқай.