Астана қаласы әкімінің бірінші орынбасары Нұрлан Нұркенов 29 қазан күні жарықтың не себепті сөніп қалғаны жөнінде түсінік берді, – деп хабарлайды Aikyn.kz.
Нұрлан Нұркеновтің айтуынша, 29 қазан күні сағат 21.57-де Астана ЖЭО-2 сыртқы тарату қондырғысында апат болып, Астана ЖЭО-2-ге қосылған 10 қосалқы станса электрсіз қалған.
Сонымен қатар Астана қаласы әкімінің орынбасары апаттың нақты себебіне тоқталды.
– Төтенше жағдай шина ажыратқышының жарылуы салдарынан болды. Осының салдарынан қысқа тұйықталу болды. Сөйтіп кеше сағат 21:57-де он қалалық қосалқы станса сөніп қалды. Мұның салдарынан оң жағалауда энергия беру шектелді. Сағат 23:00-де әуежай қосалқы станциялары іске қосылды. Сағат 23:10-да «Бәйтерек» қосалқы стансасы қосылды. Осылайша түнгі сағат 2-ге дейін барлық қосалқы станция іске қосылды, – деп түсіндірді Нұрлан Нұркенов.
Оның айтуынша, екінші станцияның жұмысында ешқандай технологиялық үзіліс болмаған. ЖЭО-2 жұмысын жалғастырды және қалыпты режимде жұмысын жалғастырып жатыр. Төтенше жағдай бір жарым сағат ішінде толығымен жойылып, түнгі сағат 2-де барлық абонентке электр қуаты берілді.
Нұркеновтің сөзінше, Алматы, Байқоңыр және Сарыарқа аудандарында барлығы 100 мыңнан астам абонент электр қуатынсыз қалған. Апат себебін жою үшін шұғыл қызметтер дереу жұмылдырылды.