Қазақтың ұлттық киіміне «екінші тыныс» берген Мәриям небәрі 5-сыныпта оқиды. Бірақ шынашақтай қыздың сұлулығымен бірге, ұлттық киімге деген махаббаты оның даңқын сән әлемінің астанасы – Миланға дейін жеткізді.
Төрткүл дүниенің «мен» деген сәнгерлерін мойындатқан кішкентай модель Мәриям Атырау облысына қарасты Құрманғазы ауданының Көптоғай ауылында тұрады. Қазір осы ауылдағы Сәбит Мұқанов атындағы жалпы білім беретін мектепте оқып жатыр. Анасы Арайлым Қарабалаева кішкентай модельді мұндай биіктерден көреміз деп ойламағанын айтады.
«Мәриям бала күнінен суретке түсуге жақын болды. Аяғына менің туфлиімді киіп алып, «мен ханшайыммын» деп айнаның алдында жүретін. Мәриямның алғашқы «подиумы» үйдегі айна алдынан басталды десек те болады», – дейді анасы Арайлым.
Мәриямның модель ретіндегі мансабының басталуы да қызық болған. Көптоғай Ресеймен шекаралас орналасқан ауыл болғандықтан, жергілікті тұрғындар түрлі шаруамен көрші елдің Астрахан қаласына жиі барады. Мәриямды да ата-анасы алғаш рет Ресейге апарып, қарапайым фотосудияда фотосессия жасатқан.
«Сол кезде фотографтар Мәриямның ерекше образын байқап, біздің балаға фотобайқауларға қатысуға кеңес берді. Сөйтіп, Мәриям алғаш рет кішкентай модельдердің онлайн конкурсына қатысып, бірінші орынды жеңіп алды», – дейді анасы.
Мәриямның дүниежүзілік деңгейдегі ең үлкен жетістігінің бірі –халықаралық сұлулық байқауында «Әлем моделі – 2022» титулын жеңіп алғаны еді. Ресейдің Сочи қаласында өткен байқауға әлемнің 109 елінен кішкентай модельдер қатысқан. Бірақ «Адай» күйімен қазақтың ұлттық киімін киіп шыққан Мәриям әділқазылардан бастап, барлық қатысушыны таңғалдырған.
«Байқау бірнеше турдан тұрды. «Танысу», «Лимузиндегі фотосессия» сияқты турларда қазылар алқасы кішкентай қатысушылардың сахнадағы мінез-құлқына, киім киісіне, музыканы таңдауына қарай бағалады. 109 жас модельдің ішінен Мәриямды ең үлкен титулға лайық деп тапқан қазылар алқасы ұлттық колоритті заманауи стильмен шебер үндестірген қазақ қызының образына жоғары баға берді», – дейді Арайлым.
Бір қызығы, Мәриям көрсетілімге киіп шығатын киімдерінің эскизін өзі сызады. Тіпті, матасына дейін өзі таңдайды. Әлемнің сәнгерлері мойындап отырған Мәриямның киімдерін әпкесі Ботакөз тігеді екен. Ол Көптоғайға көршілес орналасқан Жасталап ауылында тұрады. Қандай жарыстарға барса да жеңіссіз оралмайтын Мәриямның құпиясы, анасының айтуынша, отбасының қолдауында.
«Үйде жалғыз бала болған соң көңіліне кірбің түсіргіміз келмейді. Әкесі де, ата-әжесі де Мәриямның пікірімен санасамыз. Қатысқысы келген жарыстардың барлығына қатыстыруға тырысамыз. Бірақ қанша жетістікке жетсе де, қызымыз қарапайым, жанашыр мінезінен айныған емес. Бала болып қиқарлануды білмейді. Сондай-ақ Мәриям, қашанда өзіне сенімді. Бұл қасиеттің де үлкен пайдасы тиді», – дейді анасы.
Осылайша, кішкентай Мәриям әлемнің түкпір-түкпірінде өткен халықаралық «Әлем жұлдызы – 2021» сұлулар байқауының бас жүлдесін, халықаралық жас модельдер байқауының «Топ модель – 2022» титулын, «Үздік модель – 2022» атағын, «Әлем сұлуы – 2023» байқауының және Ресейдің халық суретшісі В.Зайцевтың 85 жылдығына арналған Халықаралық байқаудың TEEN MISS COMMUNITY – 2023 номинациясы бойынша бас жүлдесін иеленді. Италия, Дубай және Малайзиядан да шақыртулар алды.
Қазір Мәриям – «Әлем жұлдызы», «Красавица земного шара» атты халықаралық сәндік конкурстардың амбассадоры, «Бақдәулет kids» балалар киім дүкенінің моделі.
Сұлулық байқауларынан бөлек, бос уақытында сурет салумен, хореографиямен де айналысады. Сүйікті пәні – математика. Қазақтың ұлттық киімімен бірге, күйлерін насихаттап жүрген кішкентай ханшайым оқуда озат. Математика, логика бағытындағы аудандық, республикалық, халықаралық байқаулардың жеңімпазы.
Анасы Арайлымның айтуынша, Мәриям модельдер әлемінде мектепті аяқтағанға дейін ғана өнер көрсетеді. Мектеп бітірген соң Оңтүстік Корея еліне барып, медициналық білім алуды жоспарлап отыр. Болашақта Мәриям білікті хирург болуды армандайды.
Өзгелерге көмектесуге, қолындағысын бөліп беруге әркез әзір тұратын Мәриям сезімтал, жанашыр болып өсіп келеді. Қазақ, орыс тілдерін еркін меңгерген Мәриям ағылшын тілін үйреніп жүр.
Баян ЖАНҰЗАҚОВА