Ынтымақтастық, экономикалық, сауда және ауыл шаруашылығын арттыру бойынша бірқатар меморандумға қол қойылды. Бұл туралы Түркістан облысының әкімі Дархан Сатыбалдының төрағалығымен өткен жиында айтылды.
Айта кетейік, мұның бәрі өңірдің өркендеп, дамуына, тұрғындарды жұмыспен қамту, халықтың әл-ауқатын көтеруге бағытталған жобалар.
Басқосуда облысқа инвесторлар тартып, өндірістік кәсіпорындарды аралап, кәсіпкерлермен тәжірбие алмасу мақсатында ұйымдастырылған шара нәтижесі туралы толықтай баяндалды. Осы тұрғыда облыс басшысы бұл бағыттарды жүзеге асыру бойынша тиісті тапсырмалар берді.
Жиынға қытайлық инвесторларда онлайн байланыс арқылы қатысып, олармен облыста бірлескен кәсіпорындарды құру бойынша бірқатар жобаларды талқылады. Дархан Сатыбалды Сайрам, Сауран, Отырар, Қазығұрт, Ордабасы аудандары және Кентау қаласының әкімдерінің есебін тыңдаса, 20-дан астам кәсіпкердің де жаңа жобалары таныстырылды. Бұған дейін дәл осындай іссапар Шардара, Жетісай, Сарыағаш, Келес, Мақтаарал аудандары және Арыс қалалары әкімдерінің қатысуымен ұйымдастырылған болатын.
Нәтижесінде, бұрғылау машиналары мен крандарға қажетті жабдықтар шығарумен айналысатын, жылу қазандықтарын шығаратын, тоқыма кластарын дамытып, қағаз және сүт өнімдерін шығарумен айналысатын компаниялармен бірлесе жұмыс жүргізу көзделген. Жылыжай өндірісін дамыту, балық шаруашылығы, мал бордақылау кешені, етті терең өңдейтін цех құрылысына қажетті жаңа технологиялардың жабдықтарын шығаратын өндіріс орындарын ашу мүмкіндіктері қарастырылуда.
Сондай-ақ азық-түлік консервілеу бойынша жеміс-жидек өнімдерін кептіретін аппарат шығарумен айналысатын, ауыл шаруашылығы техникаларын және көмір жағу арқылы электр энергиясын, алюмин, газаблок, кірпіш өндірумен айналысатын компаниялардың тәжірибесін пайдаланып, өңірде жүзеге асыру қолға алынбақ.
Облыс әкімі бастаманың нәтижелі болуы үшін бұл жұмыстарды тұрақты түрде жүргізуді тапсырды. Инвестиция тарту бағытындағы жұмыстарды күшейтіп, жүйелі жолға қоюды міндеттеді.
– Босаңсуға еш себеп жоқ. Ел экономикасын дамытып, халықтың лайықты өмір сүруіне жағдай жасауға, тұрақты жұмыс орындарын ашуға міндеттіміз. Оның жолдарын көзбен көріп келдіңіздер. Енді осыны тұрақты жолға қою керек. Күнделікті жұмыс істеп, жүзеге асырған жөн. Әлі де нақты жобалар аз. Инвестор өзі келіп, жоба ұсынатын заман жоқ қазір. Олай ойлауды қойыңыздар. Сананы өзгерту керек. Ізденіңіздер. Өңір экономикасы жақсара түсуі үшін инвестиция тартудың маңыздылығы айрықша. Оның үстіне, қосымша қаржы көздерін табуымыз қажет, – деді Дархан Сатыбалды.
Өңір басшысы барлық әкімге инвестициялық ахуалды жақсартуды жүктеді. Бұл мәселеге әр аудан әкімі жеке жауапты екенін ескертті. Кәсіпкерлікті дамытудың негізгі бағыт екенін атап өтті.
Т.БЕЙСЕН,
Түркістан облысы