Осыдан бір ай бұрын құрылысы жүріп жатқан жаңа әуежай терминалына барған қала басшысы ондағы бірқатар олқылықтарды жоюға тапсырма берген болатын. Жуырда осынау нысанға қайта келіп, бір ай бұрын берген тапсырмалардың орындалу барысы мен жұмыс қарқынын бақылап қайтты. Шаһар басшысы сала мамандарымен кездесу кезінде әрбір нысан құрылысы белгіленген мерзімде тапсырылып қана қоймай, сапалы шығуға тиіс деп шегеледі.
Жалпы, жолаушылар терминалы құрылысының 1-кезеңі аяқталып, шатыры монтаждалған. Қасбеті жаңғыртылыпты. Сонымен қатар жаңа әуежайға инфрақұрылым жүйелерін тарту жұмыстары кестеге сай жүргізілуде. 800 адамды жұмысқа тартқан. Жаңа терминалдың жалпы ауданы 40 800 шаршы метр болады. 24 эскалатор, 2 трафик, 24 жеделсаты, заман талабына сай келетін 4 галерея қарастырылған. Барлығы жеке инвестор есебінен салынуда.
Аэропортта жолаушы өткізу қабілеті сағатына 200 адам болса, жаңа терминал іске қосылғаннан кейін бұл көрсеткіш еселеніп, 2 000 адамға артады.
Бүгінде перрон құрылысын жүргізуге жобалық-сметалық құжаттар әзірленіп, мемлекеттік сараптаманың оң қорытындысы берілген. 6 гектар аумақта тиісті жұмыстар атқарылуда. Әуежай құрылысының 2-кезеңі 2024 жылы аяқталып, ел игілігіне беріледі деген жоспар бар.
Шымкент қаласының энергетикалық әлеуетін 2025 жылға дейін даму жоспарына сәйкес, электр қуатын таратушы 6 қосалқы станса салу жоспарланған. Соның бірі – «Ақжар» қосалқы стансасы. Қала әкімі Ғабит Сыздықбеков «Ақжар» қосалқы стансасының да құрылыс жұмыстарымен танысты. Жауапты мердігермен кездесіп, бірқатар мәселені талқылады.
Осыдан төрт жыл бұрын құрылысы басталған нысанның жалпы аумағы 732 шаршы метрді құрайды. Қазіргі кезге дейін 13,6 шақырымға кабель тартылған.
Стансаға 110 кВ-тық трансформатор, «Забадам» қосалқы стансасынан «Ақжар» қосалқы стансасына дейін ұзындығы 15,2 шақырымды құрайтын 110 кВ-КЛ жабдықтары орнатылмақ. Жоспар бойынша нысан құрылысы 2024 жылдың сәуір айында аяқталады. Жаңа қосалқы станса іске қосылғанда 50 мыңға жуық халық және сол аумақтағы бизнес объектілері сапалы электр қуатымен қамтылады.
Қала әкімі құрылысты аралау барысында тиісті басқарма басшыларына бірқатар тапсырма жүктеп, жұмыстың мерзімінде орындалуын қадағалауды тапсырды.
Үшінші мегаполистегі стратегиялық маңызы бар нысандардың да құрылысы қарқынды. Қала әкімі Ғабит Әбдімәжитұлы Сайрам шағынауданында салынып жатқан және әкімшілік-іскерлік орталығындағы құрылысы біткен деполардың жұмысын көрді.
Әкімшілік-іскерлік орталықтағы нысан заманауи құрылғылармен және халықаралық стандарттарға сай техникамен жабдықталған. Құрылысы толығымен аяқталып отыр. 4 автокөлікке арналған өрт сөндіру депосында қызметкерлердің нәтижелі жұмыс істеуіне әрі тынығып, демалулары үшін қажетті жағдайларды қамтамасыз ететін ыңғайлы қызметтік және тұрмыстық үй-жайлар қарастырылған. Сыртқы аумақта кәсіби дағдыларын машықтандыруға арналған оқу-жаттығу мұнарасы, спорт алаңдары да бар.
Ал Сайрамдағы депо жұмысы 30 пайызға орындалған. Мұнда да қойма, оқу жаттығу мұнарасы, жүгіру жолағы, автотұрақ қарастырылған. Озық үлгіде жабдықталатын ғимаратта өрт сөндіру көлік үй-жайлары, әкімшілік кабинеттер болмақ. Нысан құрылысы келесі жылға өтпелі.
Қала әкімі ғимараттарды аралау барысында жауапты басқарма басшыларына әрбір жұмыстың сапалы атқарылуын және мерзімінде аяқталуын нықтап тапсырды. Айта кетейік, жаңа депо өрт сөндіру бөлімшелерінің жеделдігі мен ұтқырлығын арттыруға және материалдық залал мен адам шығынын азайтуға айтарлықтай мүмкіндік бермек.
Жұмысты тиянақты әрі әділ істеу керек
Ал Сайрам тұрғын алабындағы №10 колледжінің құрылыс жұмысындағы өрескел кемшіліктерді байқаған қала басшысы құрылысқа жауапты сала басшыларын қатты сынға алды. Халық игілігі үшін жұмысты тиянақты әрі әділ істеу керектігін баса айтты. Жауапты мердігер мекеменің басшысы кеткен қателікті мойындап, тез арада ретке келтіруге уәде берді.
Айта кетсек, мұнда 300 орындық оқу корпусының құрылысы жүргізілуде. Корпуста 200 орындық асхана мен АКТ залы және спортзал блогі қарастырылған. Қазір құрылыс жұмыстары аяқталуға жақын. Желтоқсан айында пайдалануға берілуі керек.
Сондай-ақ құрылысын бақылаған нысандардың бірі – Сайрам тұрғын алабындағы №12 спорт мектебінің қосымша корпусы. Екі ауысымда жұмыс істейтін нысанның әр ауысымында 147 адам оқу-жаттығумен айналыса алады.
Жобаға сәйкес ғимараттың жертөлесінде пауерлифтинг, ауыр атлетика оқу-жаттығу залдары, киім ауыстыру, жуынатын орын, бапкерлер мен төрешілер бөлмелері қарастырылған. Бірінші қабатта вестюбиль-фойе, киім бөлмесі, 18 орындық асхана, 210 орындық әмбебап спортзал, медпункт болады. Ал екінші қабатында демалыс орны, бокс, күрес, бадминтон оқу-жаттығу залдары орналасады. Бүгінде нысанның құрылыс-монтаж жұмыстары 72 пайызға орындалған. Құрылыс келесі жылға өтпелі.
Сондай-ақ қала басшысы аталған тұрғын алаптағы №10 колледждегі құрылыс жұмысын бақылады. Мұнда 300 орындық оқу корпусының құрылысы жүргізілуде. Корпуста 200 орындық асхана мен АКТ залы және спортзал блогі қарастырылған. Қазіргі уақытта құрылыс-монтаждау жұмыстары 95 пайызға орындалған. Құрылыс жұмыстары желтоқсан айында аяқталып, пайдалануға беріледі.
Қала әкімі жауаптыларға ғимараттардың құрылысын жобаға сай жүргізіп, нысандарды өндірістік кестеге сәйкес қолданысқа беруді тапсырды.
Сайрам тұрғын алабындағы 3 кезең бойынша жүргізіліп жатқан сапалы ауызсу құбырының құрылысы да жергілікті билік назарында. Қазіргі таңда аталған құрылыстың екі кезеңі бойынша жұмыс жүргізіліп жатыр. Екі кезеңде 99,5 шақырым ауызсу құбыры тартылуы қажет. Бүгінде жұмыстың 83 пайызы аяқталған. Құрылыс жұмыстары біткен соң, 6 860 абонент сапалы ауызсумен қамтамасыз етіледі.
Жалпы, ауызсу жүйелерінің ұзындығы 100,9 шақырымды құрайды. Үшінші кезең аяқталғаннан кейін 10 965 абонент ауызсу жүйесіне қосылады. Құрылыс жұмыстарын жыл соңына дейін толық бітіру жоспарланған. Құрылысты «Мелиоратор» ЖШС мердігер мекемесі жүргізуде. Қала басшысы жауаптыларға құрылысты сапалы аяқтап, мерзімінде атқару бойынша тапсырма жүктеді. Қалада биыл сапалы ауызсумен толық қамту мақсатында 6 нысанда су құбырларын тарту жұмыстары кезең-кезеңімен іске асуда. Нәтижесінде, жыл қорытындысымен 72 мыңнан астам адам орталықтандырылған ауызсу жүйесіне қосылып, көрсеткіш 98,5 пайыздан 100 пайызға жетпек.
Сапаға мән берген абзал
Статистикаға сәйкес, Шымкент қаласы – автокөлік көбеюі жағынан елімізде көш бастап тұрған қалалардың бірі. Осы мәселеге орай, соңғы жылдары қалада жол құрылысы бұрын соңды болмаған қарқынмен дамуда. Биыл Шымкентте орталық магистрал және ішкі орам көшелеріне орташа жөндеу жұмыстарын жүргізу 245 көшеге жоспарланған. Бүгінде 172 көшеде жұмыстар аяқталып, тұрғындар игілігін көруде. Жалпы, Шымкент қаласының дамуы жолында жол инфрақұрылымы мен көлік саласын өркендету міндеттеріне үлкен жауапкершілік жүктелген. Шымкент қаласы бойынша жолдардың жалпы ұзындығы 3 247,6 шақырымды құрайды. Жыл соңына дейін жолдың жақсы және қанағаттанарлық жағдайын 71,2 пайызға жеткізу мақсатында жұмыстар жүргізіліп жатыр.
Айта кетейік, көлік саласы бойынша 2020 жылы қалалық мәслихат пен Шымкент қаласының жолаушылар көлігін дамытудың кешенді схемасы бекітіліп, схемаға сәйкес, 77 маршрутты құрайтын жаңа маршруттық желісі әзірленген. Маршруттық желісімен 6 ХАБ, 33 жеткізуші, 39 магистралды және 6 айналма маршруттары қаралған. Бүгінде маршруттар толығымен қызмет көрсетуде. Қала аумағындағы, сонымен қатар шет аймақтарда орналасқан барлық шағынаудандары мен тұрғын алаптары қоғамдық көлікпен 100 пайыз қамтылған.
Шымкентте қоғамдық көліктердің жол ақысы үш жыл бұрын қымбаттаған болатын. Бүгінде қоғамдық көлік жолақысы 70 теңге және бұл – республика бойынша ең арзан тарифтік көрсеткіш. Қазір қоғамдық көліктердің жолақысын көтеру мәселесі қаралып жатыр.
Қала әкімі Ғабит Сыздықбеков жол құрылысы нысандарын аралап, жұмыс барысымен танысты. Бүгінде бас жоспарға сай салынып жатқан Қонаев даңғылының жалғасында құрылыс қарқынды жүргізілуде. Бұл құрылыс Бадам көпірінен оңтүстік бағытқа қарай 4,7 шақырымды құрайды. Қазір 2,8-4,7 шақырымдар аралығында жол негіздері салынып, асфальтобетон жабындысының төменгі қабаты жүргізілген. Сонымен қатар мұнда инженерлік желілер жобаға сәйкес қайта орнатылды.
Құрылыс жұмыстары Бадам өзені арқылы өтетін көпірден Саттарханов көшесіне дейінгі аралықта жалғасуда. Аталған жол бөлігін көлік қозғалысына 5 қарашаға дейін ашу жоспарланып отыр.
Бүгінде Жансүгіров, Анаров көшелерінен Рашидов көшесіне дейінгі аралықта көлік нөпірі көп. Жүріс бөлігі төмен түсіп, шұңқырлар пайда болғандықтан, көлік қозғалысына қауіптілігі ескеріліп, орташа жөндеу жүргізілуде. Қала басшысы осы аумақта атқарылып жатқан жұмыстардың қарқынын қадағалады. Жобада жол жамылғысын жаңарту, құдықшаларды ауыстыру қарастырылған. Қала әкімі жауаптыларға ең алдымен сапаны назарға алып, жұмыстарды өндірістік кестеге сай аяқтауды тапсырды.
Бозарық шағынауданында бой көтерген көпқабатты тұрғын үйлер құрылысының барысы да қала басшысының қадағалауында.
Бүгінде 74 гектар аумақта 2 000-нан астам пәтерлі 54 көпқабатты тұрғын үйдің құрылысы жүргізілуде. 18 нысан жыл соңына дейін қолданысқа беріледі.
Ал ішкі орамдық 3 инженерлік инфрақұрылым нысанының құрылысы жуырда аяқталады. Қалған 6 нысан келесі жылға өтпелі.
Қала әкімі мердігер мекеме басшыларының жауапкершілігін күшейтіп, құрылысты сапалы, мерзімінде жүргізуді тапсырды.
Назгүл НАЗАРБЕК,
Шымкент қаласы