Қазақстанда қызылша бойынша қолайсыз эпидемиологиялық жағдай анықталды. 2023 жылдың басынан бастап республика бойынша қызылшаның 12 671 жағдайы тіркелген. Оның ішінде 10 563 науқас 14 жасқа дейінгі балалар, жасөспірімдер – 354, ересектер – 1 754. Бұл туралы Денсаулық сақтау министрлігі мәлімдеді, – деп хабарлайды Aikyn.kz.
Нақты айтсақ, 70% немесе 8 866 жағдай вакцинацияланбаған балаларға тиесілі. Оның ішінде вакцинациядан бас тарту себебінен – 5 286, медициналық қарсы көрсетілімдер – 1 555, егу жасына жетпеу – 1 930, өзге себептер 93 екенін айта кету керек. Тағы 16% немесе 2 062 жағдай белгісіз вакцинациялау мәртебесі бар адамдар.
Қызылшаны тіркеу елдің барлық өңірлерінде байқалады.
Қызылшамен сырқаттану бойынша эпидемиологиялық жағдайды тұрақтандыру үшін шұғыл ден қою шаралары қабылданады.
«Қазақстан Республикасы халқының арасында қызылшамен сырқаттанушылықтың одан әрі таралуының алдын алу және елдегі эпидемиологиялық жағдайды тұрақтандыру мақсатында "Қызылшаға қарсы санитарлық-эпидемияға қарсы және санитарлық-профилактикалық іс-шаралар жүргізу туралы" Қазақстан Республикасының Бас мемлекеттік санитариялық дәрігерінің 2023 жылғы 1 қарашадағы №7 қаулысы шығарылды. Көрсетілген қаулыға сәйкес, осы жылғы 6 қарашадан бастап қызылшаға, қызамыққа және паротитке (ҚКП) қарсы 6-11 айлық балаларға, желтоқсаннан бастап – қызылшаның егу мәртебесіне қарамастан 2-4 жастағы балаларға қосымша жаппай иммундауды (ҚЖИ) жүргізуді бастау жоспарлануда», – делінген хабарламада.