Бүгінгі Кентау өркендеуінде жаңа ұстанымды – моноқалаларды дамыту тұжырымдамасын бағдар етіп айқындаған қала. Жаңарған Түркістанның жылы лебі қарт Қаратаудың етегіндегі жауһар шаһардың тынысына тың серпін берді десек те болады.
«AMANAT» партиясы Түркістан облыстық филиалы Сайлауалды бағдарламасының 83-тармағында Кентау қаласындағы 55 көпқабатты тұрғын үйді күрделі жөндеу жұмыстары қаралған. Аталған 55 үйге тұрғындардың талап-тілегімен қосымша тағы бір көпқабатты тұрғын үйге сейсмикалық күшейту жұмыстарына қаржы бөлініп, бүгінде құрылыс жұмыстары аяқталуға жақын. Партияның Түркістан облыстық филиалы атқарушы хатшысының орынбасары, облыстық мәслихат депутаты Қалыйма Жантөрееваның тікелей ұйытқы болуымен іргесі қирауға шақ қалған бес қабатты тұрғын үйдің іргетасын бекемдеп, сейсмикалық тұрғыда күшейтуге және күрделі жөндеуден өткізуге облыс бюджетінен 108 млн теңге бөлінді.
Депутат дабыл қаққан бұл тұрғын үй – Ыбырай Алтынсарин көшесіндегі №11 мекенжайда орналасқан. Төрт жылдан бері бар базынасы басындағы баспана жайы болған тұрғындарға Қалыйма Жантөреқызы араша түсіп, Түркістан облыстық Тұрғын үй-коммуналдық шаруашылық басқармасына депутаттық сауалмен шықты. Жетпіс отбасын алаң күйге салған мәселе облыстық мәслихат сессиясында қаралып, депутаттардың көпшілік қолдауымен осы бес қабатты тұрғын үйді сейсмикалық күшейтуге және күрделі жөндеуге мақсатты қаржы бөлінді.
Кенді қаладан облыстық мәслихаттың құрамына сайланған депутат ретінде, «AMANAT» партиясы Түркістан облыстық филиалы атқарушы хатшысының орынбасары Қалыйма Жантөреқызы Кентау қаласына жасаған жұмыс сапары аясында осы тұрғын үйдегі құрылыс-монтаж жұмыстарының барысымен танысты, тұрғындармен бейресми кездесу өткізді. Тұрғындардың өтініштерін мұқият тыңдаған ол құрылыс жұмыстарына жауапты мердігер ұйым – «ААА Ақылбек» ЖШС-нің директоры Аманғали Юсупалиевке азаматтар білдіріп жатқан сұраныстарына мейлінше сергек қарауды тапсырды. Бизнестің әлеуметтік жауапкершілігі шеңберінде тұрғын үйдің кіреберістеріне жеңіл бастырма конструкцияларын орнатып беру мүмкіндіктерін қарастыруды жүктеді. Партияның Кентау қалалық филиалының төрағасы, Кентау қалалық мәслихатының депутаты Арман Басаровқа атқарылып жатқан жұмыстардың сапасын үнемі қоғамдық бақылаудың назарында ұстауды, тұрғындар мен мердігер ұйым өкілдері арасында өзара ықпалдастықты арттыруға жәрдемші болуды тапсырды.
Үй ауласында депутатпен жүздесуге шыққан тұрғындар Қалыйма Жантөреқызына көптен көтерген мәселелерінің оң шешім табуына жәрдемші болғаны үшін алғысын білдіріп, ақжарма тілектерін жеткізді. Осы тұрғын үйде ғимарат пайдалануға берілген 1971 жылдан бері тұратын асыл әже Ұлзада Қуанышова жиналған әлеуметке аналық ақ батасын беріп, ел бақытын тіледі.
Назгүл НАЗАРБЕК,
Түркістан облысы