Абай облысының әкімі Нұрлан Ұранхаев Астанада өтіп жатқан есеп беру брифингінде өңірдегі әлеуметтік-экономикалық көрсеткіштер өсімі жөнінде айтты, – деп хабарлайды Aikyn.kz.
«Алғашқы жылымыз әлеуметтік-экономикалық даму тұрғысынан оң серпінге ие. Жыл көлемінде ай сайын барлық индикаторлар бойынша тұрақты өсім сақталуда. Бүгінде өңірдің қысқамерзімді экономикалық индикаторы 107,5%-ды құрады. Негізгі капиталға салынған инвестициялар 44,2%-ға өсіп, 426,2 млрд теңгеге жетті», – деді Нұрлан Ұранхаев Астанадағы орталық коммуникациялар қызметінде.
Облыс әкімінің сөзінше, құрылыс саласында өсім – 141,1%-ға, өнеркәсіпте – 106,3%-ға, ішкі саудада – 103%-ға, ауыл шаруашылығында 101,7%-ға жетті.
Сондай-ақ 233,8 мың шаршы метр тұрғын үй пайдалануға берілді (өсім 108%), бұл 2 443 отбасын тұрғын үймен қамтамасыз етуге мүмкіндік берді.
«Өндіріс қарқыны әлеуметтік көрсеткіштерге де оң әсерін тигізді. Орташа айлық жалақы 17,6%-ға өсіп, 292,8 мың теңгені құрады. Облыс бюджетінің өз кірістері 141%-ға өсіп, қазынаға 87,4 млрд теңге түсірді. Биыл облыс бюджетінің көлемі 419,2 млрд теңгені құрады. Білім беру саласы бойынша шығыстар 1,2 есеге, денсаулық сақтау 2 есе және ауыл шаруашылығы 7 есеге өсті», – дейді әкім.
Облыс орталығы Семей қаласының бюджеті 103,1 млрд теңгені құрады, бұл өткен жылдан 51,4%-ға артық.
Тұрғын үй-коммуналдық шаруашылық саласын қаржыландыру көлемі 2 есеге және әлеуметтік қорғау көлемі 23%-ға ұлғайған.
«Президент тапсырмасымен Абай облысының 2023-2027 жылдарға арналған әлеуметтік-экономикалық дамуының кешенді жоспары Үкімет қаулысымен бекітілді. Ондағы инвестиция көлемі 1,9 трлн теңге және 102 іс-шара қарастырылған. Биыл 89,2 млрд теңгеге 45 іс-шараны жүзеге асыру жұмыстары басталды. Бес жылға арналған инвестициялық жобалар пулы жасақталды. Оған 8 мың жұмыс орнын қамтитын 1,4 трлн теңгенің 44 жобасы енді. Биылға 600 жаңа жұмыс орны бар үш жоба іске қосылды, құны – 19,1 млрд теңге», – деді Абай облысының әкімі.