27 жастағы қала тұрғыны полицияға анасының телефоны арқылы хабарласып, мектепке бомба қойылғаны туралы жалған ақпарат берген, – деп хабарлайды Aikyn.kz.
1996 жылғы азаматтың терроризм актісі туралы хабарламасынан кейін, оқиға орнына Атырау облысының Полиция департаменті, Атырау облысы прокуратурасының, ҚР ҰҚК-нің Атырау облысы бойынша департаментінің және Атырау облысы Төтенше жағдайлар департаментінің қызметкерлері барып, тексеру барысында ешқандай жарылғыш құралдың жоқтығын анықтаған.
«Қазіргі уақытта күдікті психиатриялық станционарға жатқызылды», – деп хабарлайды Атырау облысының Полиция департаменті.
27 жастағы азаматтың анасы заңды өкілі ретінде сот отырысында баласының ауыратынын, оқиға болған күні ауруханадан екпе алып, жай-күйі нашарлағанын айтқан. Сонымен қатар, 1996 ж.т. азаматтың қайда телефон соққанын білмейтінін, бұрын да дәл осындай жағдай болғанын, аталған азаматқа амбулаториялық емдеуді тағайындауды сұраған.
«Сот-психиатриялық сараптаманың қорытындысына сай аталған азамат «Параноидты шизофрения үздіксіз ағын түрі, тұрақты ақаумен» созылмалы психикалық бұзылуымен ауыратыны расталған.
Күдікті ҚР Қылмыстық кодекстің 273-бабында көзделген қылмыстық құқық бұзушылықты жасағаны үшін қылмыстық жауаптылықтан босатылып, оған Атырау облыстық психикалық денсаулық орталығының жалпы үлгідегі психиатриялық стационарда мәжбүрлеп емдеу тағайындалды», – деп түсінік берді Атырау облысы Полиция департаментінің баспасөз-хатшысы Мейірім Ердәулет.
Баян Жанұзақова