Міне, сондай сәтте жаныңнан табылатын дәрігерлердің жұмысы қандай екенін түркістандық депутаттар өз көзімен көрді.
Жақында Түркістан облысы мәслихатының төрағасы Н.Әбішов бастаған депутаттар тобы – А.Салимов, М.Тұрысбеков, И.Намазбаева, Ж.Сүлейменов, Ж.Әбдібаев, Н.Жамалбеков, С.Арыстановтар облыстық жедел медициналық жәрдем қызметінің жұмысымен арнайы барып танысты. Қызметкерлерімен жүздесіп, орталықтың қызмет ету деңгейін көзбен көрді. Мекеменің жұмысымен танысу барысында облыстық мәслихат депутаты Мағауия Тұрысбеков облыстық жедел жәрдем қызметіне өкпені жасанды желдету (ӨЖЖ) аппаратының 5 данасын тарту етті. Жапониялық жабдық жедел жәрдем көлігіне орнатуға арналған. Аппарат адамдардың тыныс алуы қиындаған кезде қажет.
«Бұл ӨЖЖ пандемия кезінде Жапония елінен арнайы сатылып алынған. Бір аппараттың құны – 11 миллион теңге. Бүгінде адам баласының басына төнер қауіптің саны көп. Соның бірі – жазатайым болатын жарақат түрлері. Көліктер соғысқанда, күнделікті тұрмыста, құрылыста, өндірісте түрлі дәрежеде жарақат алған жағдайда жедел жәрдем қызметі шақыртылады. Ондайда мұндай құрылғының орны ерекше. Сондықтан жалпы құны 55 млн теңге болатын аппаратты орталық қызметіне пайдаланғаны дұрыс», – дейді М.Сексенбайұлы.
Жедел медициналық жәрдем стансасының құрамында 6 бекет 17 бөлімше және 46 бекет бар. Олар облыстағы 2 миллионнан астам адамға қызмет көрсетеді. Қызметтік радиусы 100 шақырымды құрайды. Түркістан облысы жедел медициналық жәрдем стансасында 142 бригада, соның ішінде дәрігерлік – 34, фельдшерлік 108 бригада бар. Өңір бойынша санитарлық автокөліктің жалпы саны – 187. Айта кетейік, аталмыш мекеме биылғы жылы жағымды жаңалықтың куәсі болды. Аймақтың жедел медициналық жәрдем стансасына арнап салынған жаңа типтік ғимарат пайдалануға берілді.