Елеулі ұлық мейрам қарсаңында қиналған жұртқа қол ұшын созып жатқан жаны жомарттар көпшілікті қуанышқа бөледі. Осы орайда, «Жанұя» орталығында «Тәуелсіздік ел бақыты» атты әлеуметтік іс-шара өтті.
Елорда тұрғындарының әл-ауқаты мен өмір сүру деңгейін арттыру мақсатында құрылған «Жанұя» орталығы азаматтардың жекелеген санаттарына әртүрлі қызмет кешенін ұсынып келеді. Орталықта өткен ізгі шарада 30-ға жуық отбасы азық-түлікпен қамтамасыз етіліп, 60 отбасына киім-кешек сертификаты табысталды.
Сарыарқа ауданы бойынша отбасын әлеуметтік сүйемелдеу бөлімінің басшысы Айгүл Болатханқызының айтуынша, көмекке зәру отбасыларға материалдық көмек қана емес, оларға заңгерлік, психологиялық және медициналық қолдау көрсетіледі. Орталықтың артықшылығы — қарапайым халық үшін қызмет ететін барлық сала мамандарының бір ұйымнан табылуында. Мәслихат депутаттары да аптасына бір рет халықты қабылдап, олардың мұң-мұқтажын тыңдайды.
– Тәуелсіздік мерекесіне орай ұйымдастырылған шараға өзіміздің орталықтың сүйемелдеуінде тұрған отбасылар қатысып отыр. Олар – мемлекет тарапынан қолдауды қажет ететін мүгедектігі бар, жағдайы төмен, толық емес отбасылар. Бұл отбасыларға психологиялық кеңестер бере отырып, осындай мәдени-әлеуметтік шараларға шақыру арқылы қоғамға бейімдеп, әлеуметтендіру жұмыстарымен де айналысамыз. Қиын жағдайға тап болған отбасыларды сүйемелдеуге аламыз. Оларды мемлекеттік бағдарламалармен таныстырып, қалай тіркелуге болатыны туралы кеңес береміз. Тіркеуде тұрған барлық отбасын аралап, тұрмыстық жағдайымен танысамыз. Бүгінде орталықтың көмегіне жүгініп отырған 295 отбасы бар, – деді А.Болатханқызы.
Халықтың тұрмыстық жағдайына көмектесу мақсатында ұйымдастырылған әлеуметтік шараға демеушілік еткен KaspiMed ЖШС басшысының көмекшісі Айгерім Абайқызы:
– Биыл қаншама отбасына әлеуметтік көмек көрсеттік. «Жанұя» орталығындағы көмекке мұқтаж адамдарға көмек көрсетуді бір ай бұрын жоспарладық. Азық-түлік себетін жинау барысында дүкен таңдауда біршама қиындық болды. Бүгін орталықтың көмегіне жүгініп отырған 300-ге жуық отбасына әлеуметтік қолдау көрсеттік. Бүгінгі іс-шарада 30 отбасына азық-түлік себетін ұсынып, 60 балаға киім-кешек дүкендеріне сертификат бердік,– деді.
Әлеуметтік шарада жомарт жандардан көмек алғандардың бірі – Маржан Нұрлыбаева. Отбасылық жағдайы төмен көпбалалы ана бұрын-соңды орталықтардың көмегіне жүгініп көрмеген. Осы жылдың жазынан бастап «Жанұя» орталығында көмекке мұқтаж отбасылардың тізімінде тұр. Ол өзі сияқты ата-ана үшін бүгінгі игі іс үлкен көмек екенін айтады.
– Бес баланың анасымын. Осындай әлеуметтік көмекке мұқтаж жандардың қатарынанмын. Ең кіші баламда аутизм синдромы белгілі болғаннан бастап, көптеген орталықтың көмегіне жүгіндім. «Жанұя» орталығы туралы танысым айтты. Жаздан бері осы орталықтың атаулы әлеуметтік көмегін алып жатырмын. Бұған дейін азық-түлікпен қамтамасыз етті, енді жақында көмір түсіріп береді. Бүгін қуаныш сыйлаған жандардың барлығына алғысымызды білдіреміз, – деп қуанышымен бөлісті қала тұрғыны.
Психологиялық көмек көрсету бөлімінің маманы Гүлбахыт Мухамадиеваның айтуынша, психологиялық көмекке жас балалардың анасы мен әйелдер тұрмыстық зорлық-зомбылық бойынша көп жүгінеді. Соңғы 10 айдағы көрсеткіш бойынша көмек сұрап келген халықтың жалпы саны 23 мың болса, олардың 1 пайызы психологиялық кеңеске жүгінеді екен. Қоғамдағы тұрмыстық жағдайы төмен отбасыға оймақтай болса да әлеуметтік қолдау білдіретін орталықтар қызметі жандана түссе, жаны жомарт жандар қатары көбейсе, ұлт болып ұйысып, бір шаңырақ астындағы елдің болашағы да жарқын, ынтымағы берік болатыны сөзсіз.
Сымбат БАУЫРЖАНҚЫЗЫ