Форумда Мемлекет басшысы Қасым-Жомарт Тоқаевтың халыққа Жолдауын және партияның сайлауалды бағдарламасын жүзеге асыру ісінде мәслихаттардағы фракция мүшелерінің алдында тұрған міндеттер талқыланды.
Форум жұмысына Мәжіліс депутаты, «AMANAT» партиясы фракциясының жетекшісі Елнұр Бейсенбаев арнайы қатысып, фракция жұмысының негізгі бағыттарына тоқталды.
«Биыл партиямыз және аманаттық депутаттар маңызды оқиғалардың басында болып, іргелі істер атқарды. Біз – қоғамның талап-тілегіне құрметпен қарап, оларға құлақ асатын партияның өкілдеріміз. Сондықтан өткен сайлауда халыққа берген уәделеріміздің орындалуын қадағалау – біз үшін өте маңызды. Бұл ретте жергілікті жерлерде де мәслихат депутаттары заң жобалары, депутаттық сауалдар, зерттеулер және азаматтарды алаңдатқан ең өткір мәселелерді батыл көтеріп, ашық түрде сын айтып, партияның сайлауалды уәделерінің орындалуына маңызды рөл атқаруы керек», – деді Елнұр Бейсембаев.
Оның айтуынша, партияның Мәжілістегі фракциясы есепті кезеңде 22 заң жобасына бастамашы болып, 128 заң жобасы қарастырды. Соның ішінде 40 заңға Мемлекет басшысы қол қойды. Бұған қоса, 58 заң Сенатқа жолданып, оған фракция мүшелері 665 түзету енгізді. Сонымен бірге осы кезеңде аманаттық фракция мүшелері Үкіметке 210 депутаттық сауал жолдады. Онда қоғамды толғандырған өзекті мәселелер қозғалып, олар тиісінше шешімін тауып жатыр.
Өз кезегінде, Мәжіліс депутаты, «AMANAT» партиясы фракциясының мүшесі Мархабат Жайымбетов өңірдегі өзекті мәселелер мен орталық деңгейде шешілуі тиіс сұрақтарға тоқталды. Бүгінде жергілікті фракция мен Мәжілістегі фракция мүшелері арасында жүйелі жұмыс жолға қойылды.
Бұл ретте партияның өңірлік филиалының және облыстық мәслихат төрағасы Наурызбай Байқадамов мәслихаттардағы партия депутаттарының алдында тұрған міндеттер туралы айтты.
«Президентіміз әрдайым елімізде өкілді билік тармағы мықты болуы қажеттігін атап көрсетуде. Бұл бастама мемлекетіміздің институционалдық тұғырын нығайтып, ел дамуына тың серпін беретіні анық. Осы тұста азаматтардың өкілді билікке деген сенімін нығайту жұмыстарын күшейткеніміз жөн. Себебі мықты мәслихаттар ғана өзекті мәселелердің шешімін табуға және аймақтардағы тұрмыс сапасын жақсартуға әсер ете алады», – деді ол.
Оның айтуынша, халықтың сенім мандатына ие болған және өңірдің әлеуметтік-экономикалық даму ісіне белсене атсалысып келе жатқан мәслихат депутаттарына жоғары жауапкершілік жүктеледі. Партия фракциясы мүшелерінің алдында тұрған басты міндеттің бірі – Президенттің «Халық үніне құлақ асатын мемлекет» тұжырымдамасында көзделгендей, тұрғындармен тұрақты кері байланыс орнату.
Айта кетейік, Қызылорда облысында барлық деңгейдегі 152 депутаттық мандаттың 124-і «AMANAT» партиясының мүшелеріне тиесілі. Олар өткен 11 айда 390 қабылдау өткізіп, мыңнан астам азаматты қабылдады. Онда көтерілген 917 мәселе оң шешімін тауып, 323 мәселе бойынша тиісті кеңес берілді.
Пленарлық отырыстан соң, форум жұмысы панельдік сессияларда жалғасты. Мұнда депутаттар сала-сала бойынша секцияларға бөлініп, өзекті мәселелерді талқылап, білімін жетілдірді.