2024 жылдың 1 қаңтарынан бастап бизнес нысандарына тексеруді жасанды интеллект тағайындай бастайды. Ұлттық экономика министрі 2025 жылы күшіне енетін Салық кодексін талқылаған жиында шағын бизнесті тексеруге қойылған мораторий күшін жойғанымен, тексерулер бұрынғыдай көп болмайтынын айтты. «Шағын және микро бизнесті тексеруге қойылған мораторий негізі былтыр бітуі керек еді. Бір жылға ұзартылды. Яғни, биыл бітеді. Былтыр жыл бойы Үкімет бизнеспен, сарапшылармен бірге бизнеске қатысты құқықтық-нормативтік актілерді сараптап шықты. 25 мың актідегі 128 мың талапты талдап, 10,1 мың талапты тиімсіз, өзектілігі жоқ деп таныдық. Заңдарға қосымша 9 мың талапты алып тастадық. Тағы 1 мың талап қалды, қазір Мәжілістің қарауында жатыр. 1 қаңтардан бастап олар да күшін жояды», – деді министр.
Оның айтуынша, 1 қаңтардан бастап бүкіл салада сын-қатерлерді басқару жүйесі енгізіледі.