Бұл қызметті смартфоныңыздағы Egov Mobile электронды үкімет қосымшасы арқылы электронды түрде пайдалануға болады.
«Білім туралы ақпаратта толық аты-жөні, ЖСН, туған күні, білім беру ұйымының деректері, жас тобы, балабақша үшін топ атауы, мектеп үшін сыныбы мен литері және колледж үшін топ коды көрсетіледі. Енді ата-аналарға оқу орнынан қағаз түріндегі анықтама алудың қажеті жоқ, жеке куәлік секілді Egov Mobile мобильді қосымшасынан мәліметтерді ұсынуы жеткілікті», – деп атап өтті Оқу-ағарту вице-министрі Айбат Ілиясов.
Барлық ақпарат Egov Mobile қосымшасындағы цифрлық құжаттарда «Отбасы» бөлімінде қолжетімді. Мұнда балабақшаға баратынын, мектепте, колледжде оқитынын растайтын білім туралы мәлімет берілген.
Енді оқу орындарынан қағаз түрінде анықтамалар алу және талап ету алынып тасталады. Бұдан басқа, баланың білімі туралы цифрлық құжаттар ата-аналар үшін көлікте жүру картасын алуда және басқа да қызметтерге жүгінуде қажет болуы мүмкін.
Еске сала кетейік, Оқу-ағарту министрлігі бұған дейін техникалық және кәсіби білім дипломдарын цифрлық нұсқада беру бойынша жұмыс жүргізген болатын.
Бұл құжаттар да Egov Mobile мобильді қосымшасында қолжетімді.
фото: maqat-tynysy.kz