3-12 қаңтар аралығында Павлодар облысында Мәжіліс депутаттары Нұржан Әшімбетов, Жарқынбек Амантай, Вера Ким жұмыс сапарымен болды. Бүгін С.Торайғыров атындағы облыстық кітапханада патронаттық тәрбие, қорғаншылық және қамқоршылық, балалар үйлерінің қызметіне қатысты қолданыстағы заңнаманы талқылау бойынша дөңгелек үстел өтті.
Жұмысқа мәжілісмендер Вера Ким, Жарқынбек Амантай, "AMANAT" партиясы Павлодар облыстық филиалының атқарушы хатшысы Айгүл Маликова, облыстық мәслихат төрағасы Илья Теренченко, депутаттық фракция мүшелері, мемлекеттік органдардың, үкіметтік емес ұйымдардың басшылары, патронаттық отбасылардың, мамандандырылған мекемелердің өкілдері қатысты.
Жиында депутат Вера Ким сөз сөйлеп, балаларды отбасымен қамту мәселесі турасында, кәсіби патронаттық отбасылар институтын құру бастамасы туралы баяндады.
«Бұл жобаның бірегейлігі – қамқоршылық органдары мен балалар үйлері, интернаттар арасындағы делдалдық алынып тасталады. Қолайсыз немесе проблемалы отбасы анықталған жағдайда, уәкілетті орган баланы алып қоя алады және оны дереу кәсіби асырап алушы отбасымен үйлестіре алады. Бұл нысанның санаты кеңейтілді, оған ата-анасының қамқорлығынсыз қалған балалар, қараусыз қалған балалар, сондай-ақ қиын жағдайға тап болған адамдар, оның ішінде физикалық немесе жыныстық зорлық-зомбылық фактілері себебінен кіреді", – деп атап өтті мәжілісмен.
Кәсіби отбасылардың болжамды институтындағы жас санаты 30-дан 63 жасқа дейін. Сондай-ақ қамқоршылықтың стандартты түрлерінен басты айырмашылықтардың бірі – балалардың кәсіби патронаттық тәрбиеде болуы уақытша – екі аптадан бірнеше айға дейін. Жобаға қатысушыларға қойылатын маңызды талаптар – балалар үшін жайлы өмір сүру жағдайларын қамтамасыз ететін өз тұрғын үйінің болуы, соттылықтың, есірткіге немесе алкогольге тәуелділіктің, балаларды тәрбиелеуге кедергі келтіретін психикалық бұзылулардың, инфекциялық немесе созылмалы аурулардың болмауы, балаларды отбасына орналастыруға байланысты психологиялық, тәрбиелік, құқықтық және басқа да тақырыптарды қамтитын арнайы даярлықтан өту, келісім және барлық отбасы мүшелері, оның ішінде туған балалары, кәсіби отбасыларды қабылдау бағдарламасына қатысу міндет.
«Бұл заң жобасына депутаттар емес, ҚР Үкіметі бастамашылық жасаған, сондықтан халық қалаулылары әлеуетті институттың әрбір аспектісіне бірдей көңіл бөледі. Осындай кездесулерде біз бастаманы мамандармен, патронаттық отбасылардың өкілдерімен, үлкен тәжірибесі бар қамқоршылармен талқылаймыз», – деп атап өтті Мәжіліс депутаты Жарқынбек Амантай.
«AMANAT» партиясы өңірлік филиалының атқарушы хатшысы Айгүл Маликова балаларды қорғау және әлеуметтік әл-ауқатты қамтамасыз ету саласында жүргізіліп жатқан жұмыстар туралы айтып, заң жобаларына толықтырулар енгізу бойынша ұсыныстармен бөлісуге шақырды.
«Партияның облыстық филиалы жанында 9 өңірлік кеңес табысты жұмыс істеуде. 2023 жылы біз денсаулық сақтау, аграрлық сектор, Мемлекеттік сатып алу салаларына қатысты мәселелерді жібердік, «AMANAT» фракциясының мүшелері заң шығару қызметіне белсенді қатысады. Қазақстандықтардың барлық бастамалары мен ұсыныстарын «AMANAT» партиясы қарайды және алдағы уақытта ҚР Парламенті Мәжілісінің депутаттарына жіберіледі», – деді Айгүл Маликова.
Облыстық мәслихат төрағасы Илья Теренченко өңірде тақырыптық жұмыс тобы құрылғанын айтты. Ол сондай-ақ республикалық жұмыс тобына Павлодар облысының өкілдерін қосу туралы ұсыныс енгізді.
Кәсіби патронаттық отбасылар институтын құру туралы заң жобасы павлодарлықтардың мақұлдауына ие болды. Кездесуге қатысушылар өз ұсыныстарын білдірді. Сонымен, «Ана үйі» ҚҚ патронаттық ата-аналар клубының жетекшісі Салтанат Сипатилова патронаттық отбасылардың мейірімділігі мен күш-жігеріне қарамастан, қоғамда оларға қатысты белгілі бір дәрежеде негатив бар екенін айтты.
«Кейбір адамдар жеке мақсаттары үшін балаларды отбасыларына алады деп ойлайды, алайда бір балаға ай сайынғы жәрдемақы мөлшері тек 10 АЕК (36 920 теңге) құрайтынына назар аударған жөн. Қамқоршылық пен патронаттың оң мысалдары туралы көбірек айту керек, жанқиярлық пен ризашылықтың орны бар нақты оқиғаларды айту керек», – деп атап өтті Салтанат Сипатилова.
Бастаманы талқылай отырып, Павлодар қалалық мәслихатының депутаты Елена Яровенко ауылдық жерлерге назар аударуды және осы аймақтарда жобаны іске асыру нұсқасын қарастыруды ұсынды.
«Бұл аудандардағы халық санын көбейтуге, жұмыссыздық деңгейін төмендетуге, балаларды ауылдық мектептерге, әсіресе шалғайдағы ауылдық елді мекендерге қайтаруға мүмкіндік береді. Кәсіби патронаттық отбасылар үшін белгіленген 70 АЕК жалақысы ауыл тұрғындары үшін жақсы көмек болады, ал қалаларда бұл қаражат жеткіліксіз болуы мүмкін», – деді Елена Яровенко.
Кездесу соңында ҚР Мәжілісінің депутаттары қатысушыларға сындарлы диалог үшін алғыс айтып, келіп түскен барлық ұсыныс мұқият қаралып, республикалық деңгейде талқылауға шығарылатынына сендірді.