Ақтөбе облысының Төтенше жағдайлар департаменті қала және аудандық әкімдіктерімен бірлесе отырып, су тасқынына қарсы дайындық жұмыстарына кіріскен. Департамент бастығының орынбасары Саид Молдақараевтың айтуынша, осы кезге дейін инженерлік жұмыстар жоспарында көзделген 103 іс-шараның 75-і іске асырылыпты. Бұдан басқа 36 іс-шарадан тұратын Жол картасы бар. Оның бүгінде 17-сі ғана орындалған.
Қазір облыс бойынша су басу аймағына жататын 36 елді мекен бар. Оның 11-ін су басу қаупі жойылып, 10 елді мекенде қауіп сейілген. Алайда 15 елді мекенді су басу қаупі әлі басым екені айтылды.
– Су тасқыны жағдайы күрделенген кезде әкімдікпен бірлесіп, 350 техника, 66 жүзу құралдары, 236 мотопомпа азаматтық қорғау қызметтерінің күштері мен құралдары дайындалды. Жанар-жағармай, инертті материалдар мен құм қаптар қоры жиналған. Сыйымдылығы 15 мыңнан асатын 87 орналастыру пункті әзірленді, – деді департамент бастығының орынбасары.
Ақтөбе қаласы әкімінің орынбасары Жұлдызбек Бисембин қала аумағынан қар шығару жұмыстарын баяндай келе, қараша айынан бастап 180 мың текше метр қар арнайы полигондарға тасылғанын жеткізді.
– Қала аумағында жалпы ұзындығы 61 шақырым еріген және жаңбыр суын өткізетін арық жүйесі бар. Оның 53 шақырымы ашық жүйе, ал 6 шақырымы жабық суағарлар болып табылады. Сонымен қатар 45 дренаждық-жинақтау құдығы, 5 сорғысу айдау бекеті бар, – деді Ж.Бисембин.
Жиында өзге де мәселелер анықталды. Мәселен, Елек, Қарғалы өзендерін кеңейту, түбін тереңдету барысында ағаштарды кесу үшін Үкімет жанындағы қоршаған ортаны қорғау комитетінен рұқсат алу керек. Бұл жұмысты қиындатып, біраз уақытты шығындаған көрінеді. Сондай-ақ мұздарды жаруға бөгде компаниялар тартылып отыр. Олармен жазбаша келісімшарт та жоқ. Бақылау жұмыстары барысында комиссия мүшелеріне су қоймаларындағы дамбалардың қолданылу мерзімін айғақтайтын құжаттарды немесе сертификаттарды ешкім көрсете алмаған. Олардың жарамдылығына ешкім кепілдік бере алмайды. Көтерілген мәселелерге орай партиялық бақылау комиссиясы тарапынан құзыретті органдарға ұсыныстар беріліп мәселелердің тез арада шешімін табу талап етілді.