Біріншіден, ол кезде журналистикада медианарық деген термин айтыла қоймаған кез. Ал «Айқын» Қазақстан медианарығына ерекше тың, соны леппен келді. Жарыққа шыққанына 7-8 ай болмай жатып, оқырманның ғана емес, журналистикада жүрген қаламгерлердің де назарын аудара бастады. Газеттің шапкасындағы «Жаңалықты бірінші біліңіз» деген айдардың өзі-ақ көп нәрсені аңғартып тұрды. Екіншіден, «Жас Алаш» газетін Нұртөре Жүсіп басқарған уақытта бірге жұмыс істеген бір топ журналистер «Айқынның» да абыройын асырып жатты. Неге тағы бірге жұмыс істеп көрмеске?! Сөйтіп, Әділбек Қаба, Айгүл Аханбайқызы, Роза Қараева, Гүлнар Жұмабайқызы, тағы басқа журналистердің қатарына қосылып, іске құмбыл кірісіп кеттік. Газеттің бас редакторы Серік Жанболат мені саясат бөлімінің тілшісі етіп қабылдады. 20 күннен кейін Жаңа жыл өткен соң, 15 қаңтарда cаясат бөлімінің редакторы ретінде «Литер» ЖШС бас директоры Ерлан Бекхожиннің бұйрығы шықты. Осылай «Айқын» газетіндегі қым-қуыт тіршілігім басталып кетті. Дәл сол кезде мен әлі де «Айқында» 15 жыл жұмыс істейтінімді, он жылға жуық басылымның бас редакторының орынбасары қызметінде болатынымды білген де, сезген де жоқпын.
Әңгіме қызметте емес, жалпы журналистикадағы жолыма ризашылығым шексіз. Бірақ мен үшін «Айқын» газетіндегі жылдарым айрықша есте қалды. 2007 жылдың мамыр айында газеттің бас редакторы болып Бауыржан Омарұлы тағайындалды. Мамыр айының соңында мені бас редактордың орынбасары етті. Бір жылдан соң, 2008 жылғы 8 ақпанында Баукең Қызылорда облысы әкімі аппаратының басшысы қызметіне ауысты. Орнына бас редактор болып Нұртөре Жүсіп келді. Өмірде, жалпы журналистиканың жолында маған осындай жақсы адамдар жолықты.
«Айқын» несімен елдің назарын өзіне аударды? Газеттің алғашқы бас редакторы Серік Жанболат пен орынбасары Әділбек Қабаның еңбегін ешқашан жоққа шығаруға болмайды. Сол жылдардағы басылымның бетін парақтасаңыз, журналистер ең өзекті мәселелерді көтерді. Ешқандай мерейтойлық, арнайы тапсырыспен жазылатын мақтау, одақтау мақалалары жарияланған жоқ. Тек қана белгілі мамандар сөз алып, көкейкесті мәселелерді сөз етті. Талқылады, ойларын ортаға салды.
Газеттің 3-бетіндегі «Ақ сөйле!» айдарын әлі оқырман ұмыта қоймаған болар. Мұнда әр саладағы мамандармен сұхбат тұрақты түрде жарияланып тұрды. Ал басылымның 1-бетіндегі үш маманға қойылатын сауалнама күннің ең өзекті тақырыбын сөз етті. Дәл осы сауалды тақырып етіп шығарудың өзі оңай емес-ті. Оған мамандардың өзі қинала жауап беретін. Бірақ бұл газеттегі ең оқылымды айдарлардың бірі болғанын ұмытқанымыз жоқ.
Бауыржан Омарұлының бас редакторлығы кезінде газеттің екінші тынысы ашылды. Жаңадан айдарлар пайда болды, тың авторлар шоғыры қалыптасты. Бір нәрсені айта кету керек, Бауыржан Омарұлының басшылығы кезінде газет журналистерінің 60-70 пайызы шетелдік сапарларға шықты. Газет зиялы қауымның мінберіне айналды. Журналистерде жаңа ізденіс пайда болды.
Ал Нұртөре Жүсіптің бас редакторлығы тұсында газеттің абыройы асты. Басылымға жаңадан жастар келді. Олар газетке соны леп әкелді. «Айқынның» бейсенбі күні шығатын 32 беттік етжеңді номерін оқырман асыға күтті. Тіпті, осы 32 беттік «толстушканың» бірер жыл шықпай қалған кезі де болды. Нұртөре Жүсіп бас редактор ретінде оның қайта шығуына биліктегілердің көзін жеткізді. Қазір ойлап қарасам, менің де бүкіл тыныс-тіршілігім мен қуат-күшім «Айқынның» қалыптасу жолында өтіпті. Газет аптасына бес рет шығады. Түнгі он-он бір, кейде сағат екі-үшке дейін жүретін кездер болады. Қазір таң қаламын, бірақ таңғы сегіз-тоғызда жұмыста отырасың. Мұның бәрі қалыпты жағдайға айналып кеткесін жұмыстың ауыртпалығын да сезбеппіз ғой. Тақырып табу, журналистерге күнделікті ұсыну, осының бәрінде де журналистикаға адалдық пен мамандыққа деген құрмет жатыр-ау.
Ашығын айтайын, ақпарат беруде қазір үздікке айналған Aikyn.kz сайтының шеф-редакторы болып, оның бастауында тұрып, қалыптасуына да шамамыз келгенше үлесімізді қостық. Мұның барлығы да бас редакторлардың маған артқан сенімі болар. Ол азаматтарға рахметтен басқа айтарым жоқ.
Рас, «Айқында» жүрген жылдарымды құрметпен еске аламын. Өтіп бара жатқан уақыт. «Айқынның» да жарыққа шыққанына 20 жыл толыпты. Қазіргі «Айқынның» журналистері кәсібилікті меңгерген, сан салалы тақырыпты, өзекті мәселелерді көтерген, медианарықта өз жолы, бағыты бар, қалыптасқан басылымға айналды.
Мерейтойларың құтты болсын, айқындықтар!
Берік БЕЙСЕНҰЛЫ,
«Ана тілі» газеті бас редакторының орынбасары